عىلىم جانە جوعارى ءبىلىم ءمينيسترى ساياسات نۇربەك ۇبت فورماتى وزگەرىسكە ۇشىرايتىنىن مالىمدەدى، دەپ حابارلايدى Dalanews.kz.
"Educational Testing Service (ETS) كومپانياسى – الەمدەگى تەستولوگيا سالاسىنداعى ەڭ كونە ۇيىم. كەلىسسوزدەر ناتيجەسىندە ETSء-تىڭ جەتەكشى ماماندارى قاتىساتىن ارنايى جۇمىس توبى قۇرىلادى. حالىقارالىق دەڭگەيدەگى ساراپشىلاردىڭ تاجىريبەسى نەگىزىندە قازاقستانداعى ۇلتتىق ءبىرىڭعاي تەستىلەۋدىڭ مازمۇنى مەن ادىستەمەسى تەرەڭ جاڭعىرتىلىپ، ول زاماناۋي ادىستەمە مەن باعالاۋدىڭ ساپاسى جوعارى حالىقارالىق ستاندارتقا ساي جەتىلدىرىلمەك"، – دەدى مينيستر.
بۇعان دەيىنگى جاعداي
بۇعان دەيىن دەپۋتات اسحات ايماعامبەتوۆ قازاقستاندا جاساندى ينتەللەكتتىڭ دامۋىن ەسكەرە وتىرىپ، ۇلتتىق ءبىرىڭعاي تەستىلەۋدى (ۇبت) وتكىزۋ پروسەسىن قايتا قاراۋ قاجەت ەكەنىن ايتتى.
ماجىلىستە جاساندى ينتەللەكت ماسەلەلەرىنە ارنالعان دوڭگەلەك ۇستەل بارىسىندا دەپۋتات وزگەرىستەر قاجەت ەكەنىن جەتكىزدى.
"ۇبت قالاي وزگەرىپ جاتىر؟ بۇرىنعىداي ناتيجەگە قاراپ باعالاۋ مۇمكىن ەمەس. ChatGPT بار. ۇبت قالاي ترانسفورماسيالانادى؟ وكىنىشكە قاراي، بۇل ماسەلە ءالى اشىق كۇيىندە قالىپ وتىر"، – دەدى ماجىلىسمەن بۇعان دەيىن.
