عىلىم جانە جوعارى ءبىلىم ءمينيسترى ساياسات نۇربەك ۋاقىت بەلدەۋىندەگى وزگەرىستىڭ قازاقستاندىقتارعا اسەرىن زەرتتەۋ ءۇشىن ءۇش جىلدىق بيۋدجەتتەن 160 ملن تەڭگە بولىنەتىنىن مالىمدەدى، دەپ حابارلايدى Dalanews.kz.

“ءۇش جىلدىق زەرتتەۋگە ءوتىنىم ءتۇستى. ەندى بيۋدجەتتەن 160 ميلليون تەڭگە بولىنبەك. ءبىراق ءىس جۇزىندە بۇل سوما ەكى ەسەگە قىسقارىپ، شامامەن 90-100 ميلليون تەڭگە كولەمىندە بولادى دەپ ويلايمىن”، – دەدى ول.

مينيستر زەرتتەۋدىڭ قۇنى كونكۋرستىڭ ناتيجەسىنە سايكەس انىقتالاتىنىن جانە بۇل ماسەلەنى ۇلتتىق عىلىمي كەڭەس شەشەتىنىن ايتتى. ونىڭ سوزىنشە، جوبانىڭ ناقتى ەگجەي-تەگجەيى ءوتىنىم قارالعاننان كەيىن بەلگىلى بولادى.

زەرتتەۋ پروسەسىنە بىرنەشە ينستيتۋت، سونىڭ ىشىندە فيزيولوگيا جانە گەوگرافيا ينستيتۋتتارى تارتىلۋى مۇمكىن. ادىستەر ءالى ناقتىلانباعانىمەن، ساۋالنامادان تىس تاسىلدەر قولدانىلىپ، ماسەلەنىڭ كەشەندى تۇردە قارالاتىنى ايتىلدى.

“ازىرگە تەك ءوتىنىم بەرىلدى، ال زەرتتەۋ ادىستەمەسى مەن ونى جۇزەگە اسىرۋ جولدارى كونكۋرس وتكىزىلگەننەن كەيىن انىقتالادى”، – دەپ ءتۇسىندىردى مينيستر.

ايتا كەتەيىك، بۇعان دەيىن سەنات كۋلۋارىندا عىلىم جانە جوعارى ءبىلىم ءمينيسترى ساياسات نۇربەك ءبىرىڭعاي ۋاقىت بەلدەۋىنىڭ قازاقستاندىقتارعا قالاي اسەر ەتىپ جاتقانىنا قاتىستى عىلىم زەرتتەۋ جۇرگىزىلەتىنىن مالىمدەگەن ەدى. 

سونىمەن قاتار ناۋرىزدان بەرى قازاقستاندىقتار اراسىندا ءبىرىڭعاي ۋاقىت بەلدەۋىنە قاتىستى ءتۇرلى پىكىر ايتىلىپ ءجۇر. كەيبىر ءوڭىر تۇرعىندارى بۇل ءتاسىل جۇمىس ىستەۋگە، وقۋعا ءتيىمسىز ەكەنىن دە ايتتى. ال كۇنى كەشە ۇكىمەت ءبىرىڭعاي ۋاقىت بەلدەۋىنە قاتىستى مالىمدەمە جاسادى.

پرەمەر-مينيستر ولجاس بەكتەنوۆتىڭ قاتىسۋىمەن وتكەن ۇكىمەت وتىرىسىندا ساۋدا جانە ينتەگراسيا ءمينيسترى ارمان شاققالييەۆ قازاقستاننىڭ 5ء-شى ۋاقىت بەلدەۋىنە كوشۋىنىڭ ارتىقشىلىقتارىن ايتتى. ول UTC+5 ۋاقىت بەلدەۋى ەل حالقىنىڭ 76 پايىزدان استامى (15 ميلليون 240 مىڭ ادام) كىرەتىن استانا، الماتى، پەتروپاۆل، وسكەمەن، شىمكەنت، سەمەي جانە پاۆلودار قالالارىن قوسقاندا، 67،5-تەن 82،5 گرادۋسقا دەيىنگى بويلىقتى قامتيتىنىن ايتتى.

"ەل اۋماعىنىڭ باسىم بولىگى 5ء-شى ۋاقىت بەلدەۋىندە ورنالاسقان. بۇرىنعى UTC+6 ۋاقىت بەلدەۋى العاش رەت 1930-1931 جىلدارى "بەلدەۋ ۋاقىتى + ءبىر ساعات" فورمۋلاسى بويىنشا دەكرەتتىك ۋاقىتتى قولدانۋ ارقىلى ەنگىزىلدى. UTC+5 - ەلىمىز ءۇشىن جاڭا ۋاقىت بەلدەۋى ەمەس، كەرىسىنشە تاريحي نەگىزدەلگەن ۋاقىتقا ورالۋ"، - دەدى مينيستر ۇكىمەت وتىرىسى كەزىندە.

ءمينيستردىڭ ايتۋىنشا، 195 ەلدىڭ 117ء-سى گەوگرافيالىق ۋاقىتتى ستاندارت ۋاقىت بەلدەۋىنە جاقىن تاڭداعان.

شاققالييەۆ حالىقارالىق تابيعي ۋاقىت اليانسى (IANT) ۇكىمەتتىڭ ورتالىق جانە شىعىس وبلىستار ءۇشىن گەوگرافيالىق بويلىققا سايكەس كەلەتىن جانە حالىق ءۇشىن وڭتايلى شەشىم سانالاتىن UTC+5 ۋاقىت بەلدەۋىن بەلگىلەۋ تۋرالى شەشىمىنە وڭ قورىتىندى بەرگەنىن ايتتى.

"الەمنىڭ كوپتەگەن ەلى تابيعي سيكلگە مۇمكىندىگىنشە جاقىن ۋاقىت بەلدەۋىن تاڭدادى. سوندىقتان تابيعي كۇن سيكلىنە سايكەس كەلەتىن UTC+5 ۋاقىت بەلدەۋىنە اۋىسۋ جاڭالىق ەمەس، تابيعي ۋاقىتقا ورالۋدى بىلدىرەدى. ۋاقىت بەلدەۋلەرىن وزگەرتۋ تۋرالى قابىلدانعان شەشىم عىلىمي نەگىزدەلگەن، ەكونوميكالىق تۇرعىدان ورىندى جانە ەلدىڭ ءتيىمدى جۇمىس ىستەۋ مۇددەسىنە سايكەس كەلەدى. پەتيسيانى قاراۋ ناتيجەسىندە ستاندارتتى ۋاقىت بەلدەۋىنە بارىنشا بەيىمدەلۋگە باعىتتالعان ناقتى ۇسىنىستار بەرىلدى"، - دەدى مينيستر.

پرەمەر-مينيستر ولجاس بەكتەنوۆ نەعۇرلىم تۇسىنىكتى ءاقپاراتتىق-تۇسىندىرۋ ناۋقانىن جۇرگىزۋدى تاپسىردى.

"ساۋدا ءمينيسترى قولدانىستاعى ۋاقىت بەلدەۋىنە قاتىستى جان-جاقتى دالەلدەر كەلتىرە وتىرىپ، ناقتى جاۋاپ بەردى. ۇكىمەت بۇل شەشىمدى قولدايدى. ءبىز ءبىرىڭعاي ۋاقىت بەلدەۋىنە بەكەردەن بەكەر اۋىسقان جوقپىز. ەل اۋماعىنىڭ كوپ بولىگى بەسىنشى ۋاقىت بەلدەۋىندە ورنالاسقان. سوندىقتان بۇل عىلىمي تۇرعىدان دۇرىس شەشىم"، - دەدى بەكتەنوۆ.