ەلشىلىك، كەچيورەن مۋنيسيپاليتەتى مەن وڭتۇستىك قازاقستان وبلىسى اكىمدىگى تاراپىنان ۇيىمداستىرىلعان تۇركيا ەلىندەگى «قازاقستان كۇندەرى» اياسىندا وڭتۇستىك قازاقستان وبلىسىنىڭ ونەرپازدارى ونەر كورسەتتى.

ەلباسىنىڭ «بولاشاققا باعدار: رۋحاني جاڭعىرۋ» ماقالاسى مەن قازاقستان مەن تۇركيا اراسىنداعى ديپلوماتيالىق قارىم-قاتىناستاردىڭ 25 جىلدىعىنا وراي ۇيىمداستىرىلعان مەملەكەتارالىق ماڭىزدى شاراعا وڭتۇستىك قازاقستان وبلىسىنان 42 دەلەگات كەلدى.

«قازاقستان كۇندەرىنىڭ» شەڭبەرىندە انكارا قالاسىندا «جامبىل» اتىنداعى كوشەنىڭ سالتاناتتى اشىلۋ ءراسىمى، «بولاشاققا باعدار: رۋحاني جاڭعىرۋ» اتتى حالىقارالىق عىلىمي-پراكتيكالىق كونفەرەنسياسى جانە حالىقارالىق 8ء-شى رامازان فەستيۆالىنىڭ اياسىندا «قازاقستان كەشى» اتتى كونسەرت ءوتتى.

تۇركياداعى قازاقستان كەشىندە  ءداستۇرلى اندەر مەن قازاق-تۇرىك اندەرىنەن پوپۋرريلەر ورىندالسا، «قازىنا» بي ءانسامبلى ەلىمىز مادەنيەتىن بي ونەرىمەن پاش ەتتى. «تۇمار» فولكلورلىق ءانسامبلىنىڭ سازدى ونەرى دە قوس ەلدىڭ مەرەكە دۋمانىن اسقاقتاتتى. ارنايى اتتانعان ونەر دەلەگاتتارى تۇركيا مەملەكەتىنىڭ انكارا، ادانا، مەرسين، ىستانبۇل قالالارىندا كونسەرتتىك باعدارلاما ۇسىنادى دەپ كۇتىلۋدە.

قازاقستان كۇندەرىنە انكارا قالاسى كەچيورەن مۋنيسيپاليتەتىنىڭ مەرى مۇستافا اك، وڭتۇستىك قازاقستان وبلىسى تۇركىستان قالاسىنىڭ اكىمى الىپبەك وسەربايەۆ، الماتى وبلىسى جامبىل اۋدانىنىڭ اكىمى جانداربەك دالابايەۆ، اكادەميكتەر تولەگەن قوجامقۇلوۆ، ۋاليحان قاليجان جانە ت.ب. دەلەگاتتار قاتىستى.

 

 

 

وقو اكىمىنىڭ باسپا ءسوز قىزمەتى