تۇركىستان وبلىسى – قازاقستانداعى كوپۇلتتى، مادەنيەتى مەن ءداستۇرى باي وڭىرلەردىڭ ءبىرى. مۇندا جۇزدەن استام ەتنوس وكىلدەرى تاتۋلىق پەن ءوزارا قۇرمەتكە نەگىزدەلگەن ءبىر شاڭىراق استىندا ءومىر سۇرۋدە. سوڭعى جىلدارى ايماقتاعى ەتنوسارالىق كەلىسىم مەن ىنتىماقتاستىق جاڭا دەڭگەيگە كوتەرىلىپ، قوعامدىق بىرلىكتىڭ جارقىن ۇلگىسى قالىپتاسىپ وتىر،- دەپ حابارلايدى Dalanews.kz
وبلىستا حالىقتار اراسىنداعى دوستىقتى نىعايتۋعا باعىتتالعان مادەني، اعارتۋشىلىق جانە الەۋمەتتىك جوبالار تۇراقتى تۇردە جۇزەگە اسىرىلۋدا. تۇركىستان قالاسى مەن اۋدان ورتالىقتارىندا ورنالاسقان دوستىق ۇيلەرى ەتنومادەني بىرلەستىكتەردىڭ جۇمىسىن ۇيلەستىرىپ، ءتۇرلى ۇلت وكىلدەرىنىڭ ءداستۇرلى مەرەكەلەرىن، شىعارماشىلىق كەشتەرىن جانە ءتىل ۇيرەتۋ كۋرستارىن وتكىزۋگە مۇمكىندىك بەرۋدە.
بيىلدىڭ وزىندە وڭىردە «بىرلىگىمىز جاراسقان»، «دوستىق كەرۋەنى»، «ىنتىماق مەرەكەسى» سياقتى بىرنەشە اۋقىمدى ءىس-شارالار ءوتتى. بۇل شارالار جەرگىلىكتى تۇرعىندار اراسىندا ءوزارا تۇسىنىستىك پەن سەنىمدى ارتتىرىپ، جاس ۇرپاقتىڭ بويىندا كوپۇلتتى قوعامدا بەيبىت ءومىر ءسۇرۋ قۇندىلىعىن قالىپتاستىرۋعا ىقپال ەتۋدە.
تۇركىستان وبلىسىندا ءبىلىم بەرۋ مەكەمەلەرى دە حالىقتار دوستىعىن نىعايتۋ ىسىنە بەلسەندى اتسالىسۋدا. مەكتەپتەر مەن كوللەدجدەردە «دوستىق ساباقتارى»، ەتنومادەني كلۋبتار جانە ۇلتتىق تاعامدار فەستيۆالدەرى ۇيىمداستىرىلىپ، جاسوسپىرىمدەر اراسىندا تولەرانتتىلىق پەن مادەنيەتارالىق ديالوگ مادەنيەتى دارىپتەلىپ كەلەدى.
وڭىردەگى تۇراقتىلىق پەن ءوزارا سىيلاستىقتى قامتاماسىز ەتۋ – قازاقستان حالقى اسسامبلەياسىنىڭ وبلىستىق فيليالى، جەرگىلىكتى اتقارۋشى ورگاندار جانە قوعامدىق ۇيىمداردىڭ بىرلەسكەن ەڭبەگىنىڭ ناتيجەسى. حالىقتار دوستىعى – تۇركىستان وبلىسىنىڭ باستى بايلىعى، ال ىنتىماقتاستىق – ونىڭ بولاشاق دامۋىنىڭ كەپىلى.
