بيىل بەسىنشى رەت وتكەن «Voice of Turan – 2024» حالىقارالىق قازاق اندەرى بايقاۋى ءوز مارەسىنە جەتتى. رەسپۋبليكا كۇنىنە وراي تۇركىستان وبلىسى اكىمدىگىنىڭ قولداۋىمەن ۇيىمداستىرىلعان حالىقارالىق بايقاۋدا ارمەنيادان كەلگەن ءانشى Cيۋزاننا مەلكونيان گران-پري يەگەرى اتاندى، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.
ەكى كۇن قاتارىنان وتكەن شارانىڭ العاشقى كۇنىندە شەتەلدىك انشىلەر ەلىمىزدىڭ ونەر شەبەرلەرىمەن بىرگە دۋەت ورىندادى. «Voice of Turan – 2023» حالىقارالىق قازاق اندەرى فەستيۆالىنىڭ جەڭىمپازى ازەربايجاننىڭ تانىمال ءانشىسى لاەليا الييەۆا قوناق بولىپ ءان شىرقادى. ال ەكىنشى كۇنى قاتىسۋشىلار ءوز تاڭداۋىنداعى قازاق ءانىن شىرقاپ، باقتارىن سىنادى. ونەر دوداسىنا حالىقارالىق ءان بايقاۋلارىندا جەتىستىككە جەتكەن، 18-35 جاس ارالىعىنداعى ەسترادالىق جانرداعى ورىنداۋشىلار، ۇلكەن كونسەرتتىك قويىلىمداردا تاجىريبەسى بار 16 ۇمىتكەر قاتىستى.
باعى مەن بابى قاتار شاپقان شىن تالانتتاردى شىعارماشىلىق ينتەلليگەنسيا وكىلدەرى، تانىمال ورىنداۋشىلار، كومپوزيتورلار مەن پروديۋسەرلەر بار كاسىبي قازىلار القاسى انىقتادى. ونىڭ قاتارىندا كومپوزيتور، اقىن، ق ر مەملەكەتتىك سىيلىعىنىڭ يەگەرى، «پاراسات» وردەنىنىڭ يەگەرى تولەگەن مۇحامەدجانوۆ، ءانشى، قازاقستاننىڭ حالىق ءارتىسى، ق ر مەملەكەتتىك سىيلىعىنىڭ لاۋرەاتى، كومپوزيتور، پروديۋسەر، ق ر مادەنيەت سالاسىنىڭ ۇزدىگى باعلان وماروۆ، ءانشى، قازاقستاننىڭ ەڭبەك سىڭىرگەن قايراتكەرى، «مادەنيەت قايراتكەرى» مەدالىنىڭ يەگەرى مەيرامبەك بەسپايەۆ، ءانشى، قازاقستاننىڭ ەڭبەك سىڭىرگەن قايراتكەرى، «دارىن» مەملەكەتتىك سىيلىعىنىڭ لاۋرەاتى ساكەن مايعازييەۆ، ءانشى، قازاقستاننىڭ ەڭبەك سىڭىرگەن قايراتكەرى مارجان اراپبايەۆا، ءانشى، قازاقستاننىڭ ەڭبەك سىڭىرگەن قايراتكەرى، «قۇرمەت» وردەنىنىڭ يەگەرى سۇندەت بايعوجين، رەجيسسەر، پروديۋسسەر، ق ر مادەنيەت سالاسىنىڭ ۇزدىگى، جوبانىڭ باس پروديۋسەرى مەيىرجان الياكباروۆ بار.
قازىلار القاسىنىڭ شەشىمىمەن ءى دارەجەلى ديپلوم ديميترينا گەرمانوۆا (بولگاريا)، ءىى دارەجەلى ديپلوم سامير ولچييەۆ (بەلارۋس)، ءىىى دارەجەلى ديپلوم برايم (كۋبا) مەن دارلەاني پەرنيا (ۆەنەسۋەلا) يەلەندى. سونىمەن قاتار فارو (ازەربايجان)، اەلين يەليز (تۇركيا)، سايدا مۋحامەتزيانوۆا (تاتارستان)، مۋكادداس ۋسمونوۆا (وزبەكستان)، تاررارين (يندونەزيا) بايقاۋ ديپلومانتتارى اتاندى. ال تىۆا رەسپۋبليكاسىنان كەلگەن يشكين وگلۋ «ەڭ ۇزدىك ارانجيروۆكا» ارنايى جۇلدەسىمەن ماراپاتتالدى. وزگە دە قاتىسۋشىلارعا ىنتالاندىرۋ سىيلىقتارى بەرىلدى.
ايتا كەتەيىك، فەستيۆال ماقساتى – ءتول مۋزىكانى، قازاقستاندىق اۆتورلاردىڭ ۇزدىك شىعارمالارىن، قازاق ءتىلىن ناسيحاتتاۋ. ءان ارقىلى الەمگە حالقىمىزدىڭ مۋزىكا مادەنيەتىنىڭ سان الۋاندىلىعىن كورسەتۋ. ۇلى دالا ەلىندە تۋىنداعان شىعارمالاردا ايقىن ساقتالعان مۋزىكالىق ەرەكشەلىكتەردى كورسەتۋ. تۇركى ءالىمنىڭ رۋحاني استاناسى – كيەلى تۇركىستاندى ناسيحاتتاۋ.
