تۇركىستان وبلىسىنىڭ اكىمى دارحان ساتىبالدى گەوگرافيا ءپانىنىڭ ءمۇعالىمى ارعىن باستاميگە كولىك سىيلادى. جەرگىلىكتى ۇستازدىڭ شاكىرتى يسلام ءابدىراحمانوۆ 42 ەلدەن شاقىرتۋ العان، دەپ حابارلايدى Dalanews.kz.
ۇستازدار مەرەكەسىنە وراي تۇركىستاندا “ۇستازىما مىڭ العىس!” اتتى سالتاناتتى ءىس-شاراسى ءوتتى. مەرەكەلىك جيىنعا ايماق باسشىسى دارحان امانگەلدى ۇلى ساتىبالدى قاتىسىپ، ءبىلىم سالاسىندا ايانباي ەڭبەك ەتكەن بارشا ۇستازدار قاۋىمىن كاسىبي مەرەكەسىمەن قۇتتىقتادى.
قۇرمەتتى ۇستازدار! بارشاڭىزدىڭ وتباسىلارىڭىزعا – اماندىق، دەندەرىڭىزگە –ساۋلىق، ەڭبەكتەرىڭىزگە تابىس تىلەيمىن. مەرەكە قۇتتى بولسىن! ۇستاز – جاي ءبىلىم بەرەتىن ماماندىق يەسى ەمەس. ول – ەكىنشى اتا-انا، تاربيەنىڭ دە قاينار كوزى. ءبارىمىز دە ۇستازدارعا قارىزدارمىز. سوندىقتان ۇلاعاتتى ۇستازداردىڭ الدىندا بارلىق ادام قۇرمەتپەن باس يەدى، – دەدى وبلىس اكىمى.
ءوڭىر باسشىسى رەسپۋبليكالىق، وبلىستىق وليمپيادا جانە سپورت جارىستارىنىڭ جەڭىمپازدارىن دايىنداعان 30 مۇعالىمگە ءوز اتىنان ماراپات ۇسىنىپ، ارنايى سىيلىقتار تابىستادى. ونىڭ ىشىندە 10 ۇستاز “ى.التىنسارين” توسبەلگىسى مەن 20 پەداگوگ “قۇرمەت گراموتاسىن” الىپ، 200 مىڭ تەڭگە كولەمىندە اقشالاي سىياقىمەن ىنتالاندىرىلدى.
سونداي-اق، كوپتى تاڭقالدىرعان كەشتىڭ كۋلميناسيا توسىنسىيمەن جالعاستى.
دارحان امانگەلدى ۇلى شاكىرتى 42 ەلدەن شاقىرتۋ العان “تۇركىستان ءبىلىم-يننوۆاسيا” ليسەيىنىڭ گەوگرافيا ءپانىنىڭ ءمۇعالىمى ارعىن باستامي وبلىس اتىن ەلىمىزدەن بولەك، الەمگە تانىتقان ەرەن ەڭبەگى ءۇشىن كولىك كىلتىن تابىستادى.
ءبىلىم باسقارماسىنىڭ مالىمەتىنشە، بۇدان بولەك وبلىس اكىمى وقۋشىلارى رەسپۋبليكالىق وليمپيادانىڭ جەڭىمپازدارى، ءوزى ىسكەر، بەلسەندى، وبلىستىق، رەسپۋبليكالىق بايقاۋلاردىڭ جۇلدەگەرى تولەبي اۋدانى، قوسان مامىتوۆ اتىنداعى مەكتەبىنىڭ بيولوگيا ءپانىنىڭ ءمۇعالىمى، 6 بالانىڭ اناسى نۇريللا بايماحانقىزىنا نوۋتبۋك سىيلادى.
