تۇركىستان وبلىسى، سايرام اۋدانى اۋماعىندا جۇك كولىكتەرىنىڭ سالماعىن ولشەيتىن تارازىلار ورناتىلادى. بۇل ءوز كەزەگىندە اۆتوموبيل جولدارىنىڭ ەرتە توزباي، ۇزاق ساقتالۋىنا جانە زاڭسىز جەر قويناۋىن پايدالانۋدىڭ الدىن الماق،- دەپ حابارلايدى Dalanews.kz
سايرام اۋدانى كولەمىندە جەر قويناۋىن زاڭسىز پايدالانۋ دەرەكتەرىن توقتاتۋ بويىنشا قۇرىلعان جۇمىسشى توپ جەر قويناۋىن زاڭسىز پايدالانۋدى انىقتاۋ، ونىڭ الدىن الۋ بويىنشا جۇمىستار جۇرگىزىپ جاتىر. جۇرگىزىلگەن رەيد بارىسىندا جەر قويناۋىن زاڭسىز پايدالانعان ءبىرقاتار فاكتىلەر انىقتالدى.
اۋدان اكىمدىگىنىڭ زاڭسىز جەر قويناۋىن پايدالانۋ فاكتىلەرىن انىقتاۋ جانە ولارعا زەرتتەۋ جۇرگىزۋ ماقساتىنداعى جۇمىسشى توپ قۇرامىنىڭ مۇشەلەرى مانكەنت، قارامۇرت اۋىلدىق وكرۋگى اۋماعىندا رەيدتىك ءىس-شاراسىن جۇرگىزىپ، وبلىستىق ماڭىزى بار جولدا 5 (Howo) اۋىر جۇك كولىگىندە بەلگىلەنگەن مولشەردەن ارتىق سالماق ارتۋ دەرەكتەرى انىقتالدى. جۇك تاسۋ كولىكتەرىنە زاڭدى شەشىم قابىلدانعانعا دەيىن اقىلى ايىپتۇراققا قويىلدى جانە اكىمشىلىك حاتتاما تولتىرىلدى. بۇگىنگى تاڭدا اتالعان جۇمىستار جالعاسىن تابۋدا.
ايتا كەتسەك، جەر قويناۋىن زاڭسىز پايدالانۋ دەرەكتەرىنىڭ الدىن الىپ، توسقاۋىل قويۋ ماقساتىندا، جۇمىسشى توپ مۇشەلەرى تۇراقتى تۇردە رەيدتىك-پروفيلاكتيكالىق ءىس-شارالاردى ۇيىمداستىرۋدا. اۋدان اكىمى ارمان سابيتوۆ بۇل شارانى قاتاڭ باقىلاۋعا الدى.
