حالىق ساناعى ەكى كەزەڭمەن جۇرگىزىلەدى. ءبىرىنشى – دايىندىق كەزەڭى ماۋسىم ايىندا ءوتتى. تۇركىستان وبلىستىق ستاتيستيكا دەپارتامەنتىنىڭ مالىمەتىنشە، ساناقتىڭ العاشقى كەزەڭىندە وڭىردە تۇراتىن حالىقتىڭ سانى 2 003 479 ادامدى قۇرادى. بۇل شاراعا تۇركىستان وبلىسىنىنان 127 ۋاكىل، 50 نۇسقاۋشى-باقىلاۋشى جانە 352 ينتەرۆيۋەر جۇمىسقا تارتىلدى.
ۇلتتىق حالىق ساناعىنىڭ ەكىنشى، نەگىزگى كەزەڭى 1 قىركۇيەكتەن 30 قازان ارالىعىندا وتەدى. ونىڭ ىشىندە ونلاين ساناق 1 قىركۇيەكتەن 15 قازان ارالىعىندا بولادى.
ونلاين ساناقتان وتپەگەن ازاماتتاردى قامتۋ ءۇشىن ءداستۇرلى جاپپاي ارالاۋ ءادىسى جوسپارلانعان. ءداستۇرلى ساناق قاجەتتى سانيتارلىق نورمالاردى ساقتاي وتىرىپ، 2021 جىلدىڭ 1 قازانىنان 30 قازانىنا دەيىن جۇرگىزىلەتىن بولادى.
ارنايى ءموبيلدى قوسىمشانىڭ كومەگىمەن ينتەرۆيۋەر بارلىق كىرىكتىرىلگەن اريفمەتيكالىق جانە لوگيكالىق باقىلاۋدى ەسكەرە وتىرىپ ساۋالناما جۇرگىزە الادى. الىنعان مالىمەتتەر تىكەلەي ورتاق دەرەكقورعا جىبەرىلەدى. سۇحباتتاسۋشىلار ەلەكتروندى پلانشەتتەردى قولدانادى. بۇل ساناق پروسەسىن جۇرگىزۋ ءۇشىن تۇركىستان وبلىسى بويىنشا 3 مىڭعا جۋىق ازامات تارتىلادى. ونىڭ ىشىندە 400-گە جۋىق نۇسقاۋشى-باقىلاۋشى، 2500-گە جۋىق ساناقشى قىزمەت ەتەدى. ساناق جۇرگىزەتىن ينتەرۆيۋەردىڭ موينىندا كوك ءتۇستى «حالىق ساناعى» سيمۆوليكاسى بار شارف، كوك ءتۇستى سومكەسى، پلانشەتى جانە ينتەرۆيۋەر ەكەنىن ايشىقتايتىن بەيدج-قۇجاتى بولادى. ول قۇجاتتا فوتوسۋرەتى، ءاتى-جونى، ءتيىستى اۋماقتىق ستاتيستيكا ءبولىمىنىڭ ءمورى جانە ءنومىرى كورسەتىلەدى. ول ءنومىردى sanaq.gov.kz سايتىنداعى «ينتەرۆيۋەردى ىزدەۋ» جولاعىنا ەنگىزۋ ارقىلى تەكسەرۋگە بولادى.
