رەسپۋبليكا كۇنى قارساڭىندا تۇلكىباس اۋدانىنىڭ اكىمى نۇرلان بايعۇت باستاعان اۋدان تۇرعىندارى مەن زيالىلارى جانە ەرىكتى جاستارى «باتىس ەۋروپا – باتىس جۇڭگو» ءاۆتودالىزىنىڭ بويىنداعى جاڭادان بوي كوتەرىپ جاتقان «ۇلى دالا قىراندارى» اللەياسىندا باس قوسىپ، 300 دانا قىلقان جاپىراقتى اعاشتاردىڭ كوشەتتەرىن وتىرعىزدى، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.

كەيىنگى جاستارعا ۇلگى بولارلىقتاي ىسكە ۇيىتقى بولعان جاندارعا اۋدان اقساقالدارى ريزاشىلىقتارىن ءبىلدىرىپ، باتالارىن بەردى.

ايتا كەتەيىك، بۇگىنگى تاڭدا «باتىس ەۋروپا – باتىس جۇڭگو» ءاۆتودالىزىنىڭ بويىنان اۋدان ورتالىعىنا كىرەر تۇسىندا اۋدان اكىمدىگىنىڭ قولداۋىمەن اۋدان تۇرعىندارىنىڭ دەمەۋشىلىگىمەن «ۇلى دالا قىراندارى» اللەياسى سوعىلۋدا. جالپى 2 گەكتار اۋماقتى الاتىن دەمالىس ورنىنا جولاۋشىلاردىڭ دەمالىپ، سەرگىپ الۋى ءۇشىن بارلىق جاعدايلار جاسالاتىن بولادى.

سونىمەن قاتار الداعى ۋاقىتتا قازاق ەلىنىڭ ءبىرتۋار ازاماتتارى باۋىرجان مومىش ۇلى، شەرحان مۇرتازا جانە بالۋان شولاقتىڭ ەسكەرتكىشتەرى بوي كوتەرمەك. اينالاسى تولىق اباتتاندىرىلىپ، كوگالداندىرىلادى.

بۇگىنگى تاڭدا تۇلكىباس اۋدانىنىڭ تۋمالارى اۋىل كوركىن اجارلاندىرا تۇسەتىن نىساندى كوتەرۋگە ءوزارا 150 ملن. تەڭگە قارجى جيناپ، قۇرىلىس جۇمىستارىن ىسكە اسىرۋدا. نىسان بيىل قاراشا ايىندا پايدالانۋعا بەرىلەدى دەپ كۇتىلۋدە.