اقش-تىڭ رەسپۋبليكالىق پارتياسى ميللياردەر دونالد ترامپتى رەسمي تۇردە پرەزيدەنت سايلاۋىنا ۇمىتكەر رەتىندە ۇسىندى.
19 شىلدەدە وگايو شتاتىنىڭ كليۆلەند قالاسىندا وتكەن پارتيا سەزىنىڭ شەشۋشى داۋىس بەرۋ ساتىندە، ترامپ ءوزىنىڭ 16 قارسىلاسىنان العا شىقتى. ترامپتىڭ قارسىلاستارى دا وسال ەمەس، تاجىريبەلى ساياتكەرلەرلەر. ەندى 21 شىلدەدە بولاتىن رەسمي ءسوز سويلەۋ سالتاناتى كەزىندە، ترامپ پرەزيدەنتتىككە ۇمىتكەر بولۋ ۇسىنىسىن رەسمي تۇردە قابىلدايدى دەپ كۇتىلەدى.
ونىڭ سايلاۋالدى ۇندەۋلەرىندەگى ەلگە مۇسىلمانداردىڭ كىرۋىنە تىيىم سالۋ، مەكسيكامەن اراداعى شەكاراعا قورعان ورناتۋ جانە ايەلدەردىڭ اتىنا ايتىلعان سىندارى امەريكا حالقىنىڭ، تىپتەن رەسپۋبليكاشىل، اقش-تىڭ ەكس-پرەزيدەنتى دجوردج بۋشتىڭ دا اشۋ-ىزاسىن تۋعىزعان. دەموكراتيالىق پارتيا اتىنان ترامپتىڭ باستى قارسىلاسى بۇرىنعى مەملەكەتتىك حاتشى حيللاري كلينتون بولۋى مۇمكىن. ونى كەلەسى اپتادا فيلادەلفيادا بولاتىن دەموكراتيالىق پارتيانىڭ سەزىندە رەسمي تۇردە ورتاق ۇمىتكەر رەتىندە جاريالايدى دەپ كۇتىلەدى.
