عالىمجان مولدانازاردىڭ تابىسى تويدان ەمەس! ول شاعىن اۋديتوريادا ءان كەشتەرىن وتكىزىپ، بىلدەي ءبىر ۇجىمعا پايدا تابۋدىڭ كوزىن ۇسىنىپ وتىر. مۋزىكانتتىڭ سوزىنشە، وسىلاي شەت ەلدىك ارتىستەردىڭ تاسىلىمەن جۇمىس ىستەيتىن وتاندىق ونەرپازداردىڭ دا سانى ارتىپ كەلەدى.
“تويسىز دا اقشا تابۋعا بولادى. ديماش بار، «91» بار. ولاردا الەمگە شىعىپ جاتىر. نەگە سولاردى ايتپاسقا؟ نەگە قازاق باۋىرلارىمىزبەن ماقتانباسقا؟” – دەيدى مولدانازار.
كۇنى كەشە عالىمجان كوپشىلىك كوپتەن كۇتكەن كۇيتاباقتىڭ تۇساۋىن كەستى. «مولدانازاردىڭ» 7 ترەكتەن تۇراتىن سۋ جاڭا ءۇنتاسپاسى «ەسىمدە ءبارى» دەپ اتالادى. بۇل، ۇجىمنىڭ توپ بولىپ قۇرىلعاننان بەرگى العاشقى البومى ەكەن.
“كوممەرسيالىق كونسەرتتەر كوپ بولدى. جابىق كونسەرتتەر. سول ءۇش جىلدىڭ ىشىندە جاڭا اندەر شىعارۋعا ءبىزدىڭ ۋاقىتىمىز بولعان جوق. وسى جاڭا جىلدان باستان بارلىق كونسەرتتەرگە كەلىسىم بەرمەي، شاعىن البومدى بىتىرۋگە بەل بۋىپ، ءبىتىرىپ، تىڭدارمانىمىزعا ۇسىندىق”، – دەيدى عالىمجان.
ايتپاقشى، «مولدانازار» جەتەكشىلىك ەتەتىن كوماندا، تاياۋ كۇندەرى اقش-قا اتتانباق. مۋزىكانتتاردىڭ كونسەرتتەرى امەريكانىڭ ءتورت قالاسىندا وتەدى.
“قازاقستاننان جاقسى جەر جوق مەن ءۇشىن. سول ءۇشىن قايتىپ كەلەمىز. وسىنىڭ الدىندا امەريكادا ءبىر اي بولعاندا زورعا شىداعانمىن. ءبىر ايدان كەيىن قاشىپ كەلدىم اۋىلعا”، – دەيدى ءانشى.
«مولدانازار» توبىنىڭ اقش-تاعى العاشقى كونسەرتى، ناۋرىزدىڭ 29-كۇنى نيۋ-يورك قالاسىندا وتەدى.
https://dalanews.kz/28892
