پرەمەر-مينيستر ولجاس بەكتەنوۆتىڭ توراعالىعىمەن سيفرلىق شتاب وتىرىسى ءوتتى. وتىرىستا مەملەكەت باسشىسى قاسىم-جومارت توقايەۆتىڭ قازاقستان حالقىنا جولداۋىندا قويعان مىندەتتەرگە نازار اۋدارىلدى، دەپ حابارلايدى Dalanews.kz.
"مەملەكەت باسشىسى سيفرلىق قالىپقا كوشۋ ارقىلى ەكونوميكانىڭ بارلىق سالاسىن جاڭعىرتۋ مىندەتىن قويدى. سوندىقتان جي ەنگىزۋ ناقتى ناتيجەگە باعىتتالۋعا ءتيىس"، - دەدى ولجاس بەكتەنوۆ.وتىرىس قورىتىندىسى بويىنشا ءبىرىڭعاي ۇلتتىق سيفرلىق جۇيەنى قۇرۋعا باعىتتالعان ءبىرقاتار شەشىم قابىلدانعان.
ۇكىمەت باسشىسى مەملەكەتتىك ورگاندارعا مىناداي تاپسىرمالار بەردى:
- 15 قاراشاعا دەيىن دەنساۋلىق ساقتاۋ سالاسىنىڭ باسىم باعىتتارىنا نقا-عا ءتيىستى وزگەرىستەر ەنگىزە وتىرىپ، وتاندىق ستارتاپتاردىڭ شەشىمدەرىن ەنگىزۋ؛
- 20 جەلتوقسانعا دەيىن دەنساۋلىق ساقتاۋ سالاسىنداعى 7 ءارتۇرلى اقپاراتتىق جۇيەنى Qaztech بازاسىنداعى ينتەگراسيالانعان 2 پلاتفورماعا بىرىكتىرۋ؛
- 1 جەلتوقساننان باستاپ ەلەكتر جانە جىلۋ جەلىلەرىن دياگنوستيكالاۋ ءۇشىن جاساندى ينتەللەكتى تەحنولوگيالارىن ەنگىزۋ؛
- 20 جەلتوقسانعا دەيىن ەلدىڭ وتىن-ەنەرگەتيكالىق كەشەنىندە سالالىق اقپاراتتىق قاۋىپسىزدىك ورتالىعىنىڭ جۇمىسىن قامتاماسىز ەتۋ.
ەسكە سالايىق، 8 قىركۇيەكتە قاسىم-جومارت توقايەۆ جاساندى ينتەللەكتىنى جاپپاي ەنگىزۋ جانە جاپپاي سيفرلاندىرۋ ەلىمىزدىڭ بارلىق سالاداعى الەۋەتىن ەسەلەپ ارتتىراتىنىن مالىمدەدى.
