حات اۆتورلارى كوكجىرا اۋىلىنىڭ تۇرعىندارى “ەلەكە سازىنداعى” قابىرلەردىڭ قايتا كومىلۋىن جانە قازبا جۇمىستارىنىڭ دەرەۋ توقتاتىلۋىن تالاپ ەتكەن ەدى. Dalanews.kz بۇل ورايدا قازبا جۇمىسىنىڭ باسى-قاسىندا جۇرگەن بەلگىلى عالىمداردىڭ پىكىرىن ءبىلىپ، ماسەلەنىڭ انىق-قانىعىن انىقتاۋعا تىرىسقان ەدى.
كەيىننەن پرەزيدەنتكە جولداعان اشىق حاتتا جازىلعان دەرەكتەر جالعان بولىپ شىقتى.
قورىمداردى قازىپ، ارحەولوگيالىق زەرتتەۋ جۇمىستارىن جۇرگىزۋ شاريعاتقا قايشى ارەكەت ەمەس ەكەنىن يمامدار دا ءتۇسىندىرىپ بەردى.
– جالپى ەجەلگى تاريحي ورىندارعا ارحەولوگيالىق جۇمىستار بۇرىننان جۇرگىزىلىپ كەلەدى. ونىڭ وزىندىك ءجون-جوسىعى، ءتارتىبى بولادى. ءدىن بۇعان قارسى ەمەس. ال ەندى ءقابىردى قازىپ، ءمايىتتى قورلايتىن بولسا اڭگىمە بولەك، وندايعا جول بەرىلمەيدى، – دەيدى قمدب-نىڭ سەمەي ءوڭىرى بويىنشا وكىل يمامى اسقار مۇقانوۆ.
بەلگىلى ارحەولوگ زەينوللا ساماشيەۆتىڭ پىكىرىنشە اۋىلداعى كەلەڭسىز الەۋمەتتىك قۇبىلىستاردىڭ نەگىزگى سەبەبىن ارحەولوگيالىق قازبا جۇمىستارىنان ىزدەۋدى – بەلگىلى ءبىر توپتىڭ ءوز ارام ويىن جۇزەگە اسىرۋدىڭ قۇرالى دەپ قاراۋ كەرەك.
"قازبا جۇمىستارى جۇرگىزىلگەن نىسانداردا ەشقاشان ادامنىڭ، مالدىڭ سۇيەكتەرى شاشىلمايدى، كەرىسىنشە، تالداپ، جينالىپ الىنادى. سەبەبى، تاريحي زەرتتەۋلەردەگى اسا قۇندى دەرەككوز بولىپ تابىلاتىن ماتەريالداردى ارنايى ماماندار – انتروپولوگتار، پالەوگەنەتيكتەر جانە پالەوزوولوگتار زەرتتەيدى. ماسكەۋدەن كەلگەن ادامدار، وسى قاتارداعى ماماندار.
نىسانداردىڭ بارلىعى قايتادان جابىلادى، اسا قۇندى ەسكەرتكىشتەر اسپان استىنداعى مۋزەيلەرگە اينالادى، ولاردىڭ جوبالارى جاسالۋدا، – دەيدى عالىم.
بۇگىن اتىشۋلى حاتقا بايلانىستى كوكجىرا اۋىلى تۇرعىندارى تاعى ءبىر مارتە ءۇن قاتىپ، توقايەۆقا جازىلعان اشىق حاتتا ەموسياعا بەرىلگەندىكتەن، كەيبىر مالىمەتتەردىڭ بۇرمالانعانىن مالىمدەدى.
"كۇرمەتتى قاسىم-جومارت كەمەل ۇلى توقايەۆ!
شىعىس قازاقستان وبلىسى، تارباعاتاي اۋدانى كوكجىرا اۋىلىنىڭ "ەلەكە سازىنداعى" ارحەولوگيالىق جۇمىستاردى توقتاتۋ تۋرالى ءسىزدىڭ اتىڭىزعا جازعان اشىق حاتتا ەموسياعا بەرىلىپ، اسىعىستىقپەن پىكىر بىلدىرگەنىمىزدى ايتقىم كەلەدى.
10-تامىزدا كوكجىرا اۋىلى تۇرعىندارىنىڭ تالابىنا بايلانىستى جەرگىلىكتى اتقارۋشى ورگان تاراپىنان جان-جاقتى ءتۇسىندىرۋ جۇرگىزىلگەننەن كەيىن، اشىق حاتتا كورسەتىلگەن كەيبىر ماسەلەلەردىڭ نەگىزسىز ەكەنىن جانە ەلسەكە سازىنداعى ارحەولوگيالىق قازبا جۇمىستارىنىڭ ەل تاريحى ءۇشىن ماڭىزدىلىعى جوعارى ەكەندىگىن تۇسىندىك.
سونداي-اق، اۋىل تۇرعىندارىنىڭ «رۋحاني جاڭعىرۋ» باعدارلاماسىنا بايلانىستى مەملەكەتتىك ساياساتقا ەشقانداي نارازىلىعى جوق"، – دەيدى اۋىل تۇرعىندارى.
كوكجىرالىقتاردىڭ حاتى الەۋمەتتىك جەلىدە جاريالاندى.
