مەملەكەت باسشىسى قاسىم-جومارت توقايەۆتىڭ توراعالىعىمەن قازاقستان رەسپۋبليكاسى قاۋىپسىزدىك كەڭەسىنىڭ كەزەكتى وتىرىسى ءوتتى، دەپ حابارلايدى Dalanews.kz.
جيىندا ىشكى جانە سىرتقى كوشى-قون سالاسىنداعى نەگىزگى ۇردىستەر قاراستىرىلىپ، پرەمەر-مينيستردىڭ ورىنباسارى ەرمەك كوشەربايەۆتىڭ، سونداي-اق ىشكى ىستەر، سيفرلىق دامۋ، يننوۆاسيالار جانە اەروعارىش ونەركاسىبى، ەڭبەك جانە حالىقتى الەۋمەتتىك قورعاۋ مينيسترلەرىنىڭ اقپاراتى تىڭدالدى.
مەملەكەت باسشىسى كوشى-قون ساياساتىن ىسكە اسىرۋدا گەوساياسي فاكتورلار مەن سىن-قاتەرلەردى، دەموگرافيالىق بولجامداردى جانە حالىقتىڭ كوشۋ سەبەپتەرىن ەسەپكە الۋدىڭ ماڭىزىنا توقتالدى.
پرەزيدەنت زاڭسىز كوشى-قوندى بولدىرماۋ بويىنشا باقىلاۋدى قامتاماسىز ەتۋ، سونداي-اق ەلدىڭ ادامي كاپيتالىن ارتتىرۋدى ىنتالاندىرۋ قاجەتتىگىنە نازار اۋداردى.
وتىرىس قورىتىندىسى بويىنشا ۇكىمەتكە ءبىرقاتار ناقتى تاپسىرما بەرىلدى، سونىڭ ىشىندە مەملەكەتتىك ورگانداردىڭ فۋنكسيونالدىق مىندەتتەرىنە ساراپتاما جاساۋ مەن قايتا قاراۋ جانە كوشى-قون سالاسىنداعى بارلىق اقپاراتتىق جۇيەنى ينتەگراسيالاۋ ءىسىن كۇشەيتۋ مىندەتى جۇكتەلدى.
