ءبىزدىڭ قوعام پارتيا قۇرىلىسىنىڭ جاڭا ساپالىق كەزەڭىنە وتەتىندەي دارەجەگە جەتتى. بۇگىن ۇلتتىق قوعامدىق سەنىم كەڭەسىنىڭ  ەكىنشى وتىرىسىندا ق ر پرەزيدەنتى قاسىم-جومارت توقايەۆ وسىلاي ءمالىم ەتتى، – دەپ حابارلايدى قازاقپارات ءتىلشىسى.

– ءقازىر ساياسي پارتيانى تىركەۋ ءۇشىن ونىڭ كەم دەگەندە 40 مىڭ مۇشەسى بولۋى كەرەك. بۇل نورما ۇزاق ۋاقىتتان بەرى ساقتالىپ كەلەدى جانە وتكەن كەزەڭنىڭ تالابىنا ساي بولدى.

ەندى جاڭا ساياسي جاعدايدا ءبىر جاعىنان ازاماتتاردىڭ تالاپ-تىلەكتەرىنە، ەكىنشى جاعىنان ىقتيمال تاۋەكەلدەرگە لايىقتى ءۇن قاتۋىمىز قاجەت. ءبىزدىڭ قوعام پارتيا قۇرىلىسىنىڭ جاڭا ساپالىق كەزەڭى وتەتىندەي دارەجەگە جەتتى، – دەدى مەملەكەت باسشىسى.

وسى ورايدا ق.توقايەۆ تىركەۋ ءۇشىن پارتيا مۇشەلەرى سانىنىڭ تومەنگى شەگىن ەكى ەسەگە ازايتۋدى ۇسىندى، ياعني 20 مىڭعا دەيىن. «بۇل ايتارلىقتاي ماڭىزدى وزگەرىس. بۇل ازاماتتىق بەلسەندىلىكتى ارتتىرۋعا قوسىمشا مۇمكىندىك بەرەدى. جالپى، ءبىز پارتيالارعا جانە سايلاۋلارعا قاتىستى زاڭداردى بىرتە-بىرتە وزگەرتۋىمىز كەرەك»، – دەدى پرەزيدەنت.