2023 جىلدىڭ قىركۇيەگىندە توميريس" كىتابىنىڭ اۆتورى ەرجان ورىمبەتوۆ الماتى قالالىق سوتىنا شاعىم ءتۇسىرىپ، اۆتورلىق قۇقىقتى بۇزعانى ءۇشىن نۇرسۇلتان مەن ءاليا نازاربايەۆتاردان 50 ميلليون تەڭگە ءوندىرۋدى تالاپ ەتكەن ەدى. دەگەنمەن سوت شاعىم بەرگەننەن كەيىن ءبىر اي وتكەن سوڭ سوت قىلمىستىق ءىستى قوزعاۋدان باس تارتقان، دەپ حابارلايدى Dalanews.kz Stan.kz پورتالىنا سىلتەپ.

جازۋشى بۇل جاعدايدى پورتال تىلشىلەرىنە ەگجەي-تەگجەيلى ءتۇسىندىرىپ بەرگەن. ەرجان ورىمبەتوۆ 2013 جىلى "توميريس" كىتابىن جازىپ، ونى فيلم ءتۇسىرۋ ءۇشىن نۇرسۇلتان نازاربايەۆ پەن مادەنيەت جانە سپورت مينيسترلىگىنە ۇسىنعان.

جازۋشىنىڭ ايتۋىنشا، نۇرسۇلتان نازاربايەۆ ءوزىنىڭ كومەكشىسى ارقىلى كىتاپ ءۇشىن العىسىن جەتكىزگەن. الايدا ول فيلم تۇسىرىلىمىنە قولداۋ جاساماعان كورىنەدى. 

"2017 جىلى 10 قىركۇيەك... اياق-استىنان ءاليا نازاربايەۆانىڭ "توميريس" ءفيلمىن ءتۇسىرىپ، پروديۋسەرلىك ەتەتىنى بەلگىلى بولدى. 2017 جىلى 26 ساۋىردە پرەزيدەنت نۇرسۇلتان نازاربايەۆ رەجيسسەر اقان ساتايەۆپەن كەزدەسىپ، "توميريس" ءفيلمىنىڭ سەناريى بويىنشا ۇسىنىسىن بەردى"، – دەدى جازۋشى.

ەرجان ورىنبەتوۆ فيلم ونىڭ قاتىسۋىنسىز تۇسىرىلگەنىن ايتتى. ال ءفيلمنىڭ تۇساۋكەسەرى بولعان سوڭ، جازۋشى تۋىندىنىڭ پلاگيات ەكەنىنە كوزى جەتكەن. ناقتىراق ايتساق، فيلم سيۋجەتى، كورىنىستەرى، ديالوگتارى كەلىسىمىمسىز سوزبە-سوز كىتابىنان كوشىرىلگەن ەكەن. بۇدان كەيىن جازۋشى بىردەن ءفيلمدى ءتۇسىرۋشى مەن تاپسىرىس بەرۋشىگە اۆتورلىق قۇقىعى بۇزىلعانى تۋرالى حات جازادى. مادەنيەت جانە سپورت مينيسترلىگى مەن "قازاقفيلم" اق-نىڭ بىرلەسكەن جاۋابىندا كىتاپ پەن فيلمدەگى سايكەس كەلەتىن تۇستار از جانە كەزدەيسوق ەكەنى ايتقان.

"ماسەلەن، مەنىڭ كىتابىمداعى ەرەكشە ءسوز تىركەسى "حۆاتيت سلوۆ!” فيلمدە ءۇش رەت ايتىلعان. ال شىعارمامداعى كيردىڭ ساق تايپالارىنا ارنالعان "يا سوترۋ يح س ليسا زەملي" دەگەن جەكە سويلەم فيلمدە ەكى رەت قولدانىلعان. جۇمىسىمنان كوشىرىلگەن مۇنداي تىركەستەردىڭ لەگى كوپ. ولاردىڭ ءبارى قوسىمشادا ۇسىنىلعان. سونىمەن قاتار سپارگاپيستىڭ ۇلى 3 جاسىندا ات ۇستىندە وتىرعانى جانە 4 جاسىندا ساداق تارتقانى تۋرالى كىتابىمنان الىنعان. مۇنداي كورىنىستىڭ ۇشەۋى فيلمدە كورسەتىلگەن"، – دەپ اتاپ ءوتتى اۆتور.

جازۋشى "توميريس" فيلمىندە كىتابىنان 56 كورىنىس پەن سيۋجەت كوشىرىلگەنىن تىلگە تيەك ەتتى. ەرجان ورىمبەتوۆ ءبىرىنشى ارىزىن الماتى قالاسىنداعى المالى اۋداندىق سوتىنا جازعان. 

"ءبىراق سوت وكىلدەرى جاۋاپكەر قاي قالاعا تىركەلسە، سول جەردەگى قۇزىرلى ورگانعا شاعىمدانىڭىز دەپ ارىزىمدى قايتاردى. ءسويتىپ استانا ازاماتتىق سوتىنا 2023 جىلدىڭ 19 قىركۇيەگىندە ارىز بەردىم. مىنە، 4 اي ءوتتى. ءالى سوت وكىلدەرىنەن حابار جوق"، – دەدى "توميريس" كىتابىنىڭ اۆتورى.

ەرجان ورىمبەتوۆ سوتتان جاۋاپكەرلەردەن تالاپكەردىڭ پايداسىنا مورالدىق جانە ماتەريالدىق زالالدى ءوندىرىپ الۋدى سۇراعان. ونىڭ تالاپ ەتكەن سوماسى – 50 ميلليون تەڭگە. 

الايدا ءىس قوزعالماي، تالاپكەردەن نازاربايەۆتاردىڭ تۇرعىلىقتى جەرى مەن جسن (يين) بەرۋىن سۇرالعان. ءسويتىپ ءىس توقتاپ تۇرعاندىقتان، جازۋشى پرەزيدەنت قاسىم-جومارت توقايەۆقا حات جازىپ، سوت ۇكىمدى سوزباققا سالعانىن جەتكىزەدى. ەڭ قىزىعى، سۋديا جازۋشىعا ارىزدانعانى ءۇشىن مەملەكەتتىك باج سالىعىن (1،5 ميلليون تەڭگە) تولەۋدى تالاپ ەتكەن.  

فيلم جارىققا شىققاننان كەيىن جازۋشى بىرنەشە باسىلىمعا پلاگيات تۋرالى مالىمەت بەرگەن. اۆتوردىڭ سۇحباتى اقپارات بەتىنە شىعا سالا، سول كۇنى ۇيىنە پوليسەيلەر كەلگەن.

"تاعى شۋ شىعارسام، 5 جىل تۇرمەدە وتىراتىنىمدى ءتۇسىندىم. ءبىراق مەن پلاگيات تۋرالى جازۋدى جانە ايتۋدى توقتاتقان جوقپىن. سودان كەيىن قوقان-لوقى كورسەتۋ باستالدى”، – دەدى جازۋشى.

ايتۋىنشا، كولىگىنىڭ دوڭگەلەكتەرى كەسىلگەن جانە پوشتا جاشىگى سىنعان. 

ەسكە سالا كەتەيىك، ەكس-مادەنيەت جانە سپورت ءمينيسترى اقتوتى رايىمقۇلوۆا  تاريحي دراما كاسسادان نەبارى 480 ميلليون تەڭگە جيناعانىن مالىمدەدى.