باۋىرجان وسپانوۆ جاس بۋىننىڭ ءبىلىمى مەن دەنساۋلىعىنا وتە ۇلكەن ءمان بەرەدى. «ەكى مەكتەپتەندە سۇرايتىنىم – بالانىڭ دەنساۋلىعى، ءبىلىم دەڭگەيى، امان-ەسەن ەكەندىگى»، – دەيدى ول. بۇل مەكتەپتەر مەملەكەتتىك بولىپ سانالادى، ال كاسىپكەر بولسا – بيۋدجەتتەن بولىنگەن قارجى جەتپەگەن تۇسىن بەرەدى. بۇل – كوپ جاعدايدا مۇعالىمدەر مەن جاتتىقتىرۋشىلارعا كەتەتىن قارجى.
راسىمەن دە، مەكتەپ-ينتەرناتتىڭ جانىندا اۋدانى ءجۇز شارشى مەتردەن اساتىن جەر ۇيلەر بوي كوتەرگەن. كاسىپكەردىڭ ەسەبىنەن. بۇل جەردە مۇعالىمدەر مەن جاتتىقتىرۋشىلار تۇرادى. ۇيلەردە ءومىر سۇرۋگە كەرەك-جاراقتىڭ ءبارى بار، جاڭا جيھاز، ىدىس-اياعى، تەحنيكاسى – وقۋشىلارعا ساپالى ءبىلىم بەرۋ ءۇشىن ۇستازدار تۇرمىستىق ماسەلەگە الاڭداماعانى دۇرىس.
باۋىرجان وسپانوۆتىڭ ويىنشا، قازاقستانداعى ءار اۋدانعا فيزيكا-ماتەماتيكالىق، سپورتتىق باعىتتاعى مەكتەپتەر قاجەت، ءار وڭىردەگى ەڭ جاقسى اۋىلداردان اشۋ كەرەك. مۇنداعى جاقسى اۋىل دەپ وتىرعانى بالالاردىڭ دەنساۋلىعى ءۇشىن تابيعاتى دۇرىس، اۋاسى تازا، اعزاعا شيپا بولاتىن ەلدىمەكەندەر. كاسىپكەر قولداۋ كورسەتىپ وتىرعان مەكتەپتەردە تەك ءبىر وڭىردەن عانا ەمەس، ەلىمىزدىڭ كوپتەگەن وبلىستارىنان كەلگەن بالالار وقىپ جاتىر.
– بىزدەگى مىندەت – وليمپيادا، ازيا، الەم چەمپيوناتتارىنىڭ جۇلدەگەرلەرىن، چەمپيوندارىن دايىنداۋ، ونداي دەڭگەيدە دايىندايتىن جاتتىقتىرۋشىلار ساناۋلى عانا بولادى. سولاردىڭ اراسىنان اكەلىپ وتىرمىز. كەيبىرى ءوز سپورتىنىڭ فاناتى، بارلىق جاعدايدى جاساپ بەردىك، بالالاردى دايىندايمىز، ۇيرەتەمىز دەپ كەلىپ وتىر. ءبىرى اۋىلدىڭ تابيعاتىنا، ءبىرى جالاقىسىنا قىزىعادى. ءبىراق باستىسى، بارىنە بىردەي جاعداي جاسالعان. جاتتىقتىرۋشى باپكەر رەتىندە تەك بالامەن اينالىسۋ كەرەك. كوپ جاعدايدا جاتتىقتىرۋشىلار دايىندىقتان بولەك، جارىستىڭ قاراجاتىن دا ىزدەيدى، ۆيزاسىن دا جاسايدى، بار شارۋامەن اينالىسادى. ال مىنا جەردە ونداي ماسەلە جوق، تەك قانا چەمپيوندار دايىنداۋ كەرەك. جىلدىق جوسپار جاسالادى، سوعان ساي قارجى دا بولىنەدى، ءبارى شەشىلگەن»، – دەپ جاعدايدى سيپاتتاپ بەرىپ وتىر كاسىپكەر.
سپورت مەكتەبىنە فيزيكا، ماتەماتيكا سياقتى جاراتىلىستانۋ پاندەرى بويىنشا دا مىقتى مۇعالىمدەردى سىرتتان اكەلگەن. ءقازىر مەكتەپتەردەگى نەگىزگى بەس-التى ءپاندى اعىلشىن تىلىندە وقىتاتىنداي دايىندىق ءجۇرىپ جاتىر، ول ءۇشىن ءتىپتى اۋىلعا افريكادان ءمۇعالىم شاقىرعان دا ەكەن.
تاعى وقىڭىز:
