قونايەۆتا تانىمال قازاقستاندىق ءانشى ءابدىجاپپار ءالقوجا ۇستالدى، - دەپ حابارلايدى Dalanews.kz Tengrinews.kz-كە سىلتەپ.
جەلىدە قازاقستاندىق ءانشى ءابدىجاپپار ءالقوجا قونايەۆتا پوليسيا قىزمەتكەرلەرىنە باعىنباعانى ءۇشىن ۇستالعانى تۋرالى اقپارات پايدا بولدى.
الماتى وبلىسىنىڭ پوليسيا دەپارتامەنتى تولىق مالىمەت بەردى. وقيعا 6 شىلدەدە پوليسيا قىزمەتكەرلەرى Toyota Camry كولىگىن توقتاتقان كەزدە بولعان. تەكسەرۋ كەزىندە ولار كولىكتىڭ جۇرگىزۋشىسى، كولىك قۇرالىن باسقارۋ قۇقىعىنان ايىرىلعانىنا قاراماستان، تىزگىندە وتىرعانىن انىقتادى.
ءابدىجاپپار ءالقوجانىڭ ءوزى جولاۋشى رەتىندە باسقا KIA Carnival كولىگىندە وتىرعان. سول ساتتە ول پوليسيا قىزمەتكەرلەرىنە قىسىم كورسەتىپ، قۇقىق بۇزۋشىنى راسىمدەۋگە كەدەرگى جاساعان. بۇل رەتتە، پوليسيا مالىمەتىنشە، ءانشى ماس كۇيدە بولعان.
"الايدا، اۆتوكولىكتى ايىپپۇل تۇراعىنا جەتكىزگەن كەزدە KIA Carnival اۆتوكولىگى كەلدى، ونىڭ جولاۋشىسى، ازامات م. پوليسيا قىزمەتكەرلەرىنە قىسىم كورسەتىپ، قۇقىق بۇزۋشىنى رەسىمدەۋگە كەدەرگى جاساي باستادى. زاڭسىز ارەكەتتەردىڭ جولىن كەسۋ كەزىندە قۇقىق بۇزۋشى پوليسيا قىزمەتكەرلەرىنە باعىنبادى. ەر ادام مەديسينالىق كۋالاندىرۋعا جەتكىزىلدى، ونىڭ ناتيجەلەرى الكوگولدىك ماساڭدىقتىڭ "ورتاشا" دارەجەسىن كورسەتتى"، - دەدى الماتى وبلىسى پد وكىلدەرى.
ناتيجەسىندە كولىك قۇرالىن، كولىك جۇرگىزۋ قۇقىعى بولماعىنا قاراماستان تىزگىندەگەن Toyota Camry جۇرگىزۋشىسى 10 تاۋلىك مەرزىمگە اكىمشىلىك قاماۋعا الىندى.
سوت شەشىمى بويىنشا KIA Carnival جولاۋشىسى، ءانشى ءابدىجاپپار ءالقوجا قۇقىق قورعاۋ ورگانى قىزمەتكەرىنىڭ زاڭدى تالاپتارىنا باعىنباعانى ءۇشىن 10 تاۋلىككە قاماۋعا الىندى.
