فورۋمدى ءال-فارابي اتىنداعى قازۇۋ-دىڭ باسقارما ءتوراعاسى – رەكتورى جانسەيىت تۇيمەبايەۆ اشىپ، ايەلدەر قاۋىمىن كوكتەم مەرەكەسىمەن قۇتتىقتادى.
– قازاقستان رەسپۋبليكاسىنىڭ پرەزيدەنتى قاسىم-جومارت توقايەۆ: «ەگەمەن ەلىمىزدە ايەلدەر قاۋىمى ءۇشىن جاڭا مۇمكىندىكتەرگە جول اشىلدى. قىز-كەلىنشەكتەر ەلىمىزدىڭ قوعامدىق-ساياسي ومىرىنە دە بەلسەنە اتسالىسۋدا. وسكەلەڭ ۇرپاققا ونەگەلى تالىم-تاربيە بەرۋ ىسىندە ايەلدەر ايرىقشا ءرول اتقارادى» دەپ اتاپ ءوتتى. سونداي-اق «ايەلدەر قاۋىمىنىڭ جاسامپازدىق قاسيەتى مەن كۇش-قۋاتى جاڭا قازاقستاننىڭ دامۋىنا سەپتىگىن تيگىزەدى» دەپ ايەل-انالارعا زور جاۋاپكەرشىلىك جۇكتەدى. مەملەكەت تالانتتى، تالاپتى ايەل-انالاردىڭ دامۋىنا جان-جاقتى جاعداي جاساپ كەلەدى.سوندىقتان عىلىم جانە جوعارى ءبىلىم سالاسىنداعى ايەلدەردىڭ قوعامداعى ءرولىن كەڭەيتىپ، ۇدايى قولداۋ كورسەتۋدى ءبىز دە جالعاستىرا بەرەمىز، – دەدى ءوز سوزىندە ۋنيۆەرسيتەت رەكتورى.
سونىمەن قاتار رەكتور ايەلدەردىڭ قوعامداعى ايرىقشا رولىنە توقتالىپ، ءال-فارابي اتىنداعى قازۇۋ-دىڭ وقىتۋشى-پروفەسسورلار قۇرامىنىڭ 68 پايىزىن ايەلدەر قۇرايتىنىن اتاپ ءوتتى. ونىڭ ىشىندە 347 عىلىم دوكتورى، 572 كانديدات، 1 ق ر ۇعا اكادەميگى بار. ءبىز عالىم ارۋلارىمىزدى ماقتان تۇتامىز! كەلەسى جىلى ۋنيۆەرسيتەتتىڭ 90 جىلدىعى اتالىپ وتەدى. قازىردەن باستاپ ايتۋلى مەرەيتويدى لايىقتى قارسى الۋ ءۇشىن بەلسەندى دايىندىق ءجۇرىپ جاتىر»، – دەدى قازۇۋ باسشىسى.
![](/uploads/images/20240127162855525.jpeg)
ءوز سوزىندە قۇرمەتتى مەيمان فورۋمعا قاتىسىپ وتىرعانىنا العىس ايتىپ، رۋمىنيا ەلشىلىگى مادەني-بىلىم بەرۋ سالاسىنداعى سەرىكتەستىكتى ودان ءارى ارتتىرۋعا نيەتتى ەكەنىن اتاپ ءوتتى. رۋمىنيا قازاقستاننىڭ تاۋەلسىزدىگىن مويىنداعان العاشقى ەلدەردىڭ ءبىرى. ەكى ەل اراسىنداعى ديپلوماتيالىق قارىم-قاتىناس 1992 جىلدىڭ شىلدەسىنەن باستالعان بولاتىن.
– ءبىز رۋمىنيا مەن قازاقستان اراسىنداعى ەكىجاقتى ديپلوماتيالىق قاتىناستاردىڭ 30 جىلدىعىن اتاپ وتتىك. وتكەن جىلى پاندەمياعا دا قاراماستان وفلاين فورماتتا بايلانىستاردى قالپىنا كەلتىرىپ، ءبىرقاتار ماڭىزدى بىرلەسكەن ءىس-شارالار وتكىزگەنىمىزگە قۋانىشتىمىز. ەكى ەلدىڭ اراسىنداعى قاتىناستى دامىتۋ ماقساتىندا كوپتەگەن شارالار ۇيىمداستىرىلدى.
![](/uploads/images/20240127162855919.jpeg)
ماسەلەن استانا قالاسىندا وتكەن ساۋدا-ەكونوميكالىق جانە عىلىمي-تەحنيكالىق ىنتىماقتاستىق جونىندەگى قازاقستان-رۋمىن ۇكىمەتارالىق كوميسسياسىنىڭ 16-شى وتىرىسى وتكىزىلدى. ونىڭ اياسىندا رۋمىنيا سىرتقى ىستەر مينيسترلىگى مەن قازاقستان اراسىندا كونۆەنسياعا قول قويىلدى. مەن ءال-فارابي اتىنداعى قازۇۋ-دا سىزدەرمەن بىرگە مەرەكەنى اتاپ ءوتىپ جاتقانىما قۋانىشتىمىن. قازۇۋ مەن رۋمىنيا جوعارى وقۋ ورىندارىمەن ىنتىماقتاستىق تۋرالى كەلىسىمدەرگە قول قويىلدى. الداعى ۋاقىتتا سەرىكتەستىكتى ودان ءارى دامىتۋعا دايىنبىز، - دەدى ەلشى.
شارا اياسىندا مەرەكەلىك كونسەرت ۇسىنىلىپ، ستۋدەنتتەر سارايىنىڭ ساحناسىندا تانىمال ەسترادا جۇلدىزدارىمەن قاتار ۋنيۆەرسيتەتتىڭ تالانتتى ستۋدەنتتەرى مەن وقىتۋشىلارى ونەر كورسەتتى. كونسەرتتىك باعدارلاما سوڭىندا بارلىق قاتىسۋشىلار، كورەمەندەرمەن بىرگە «انا تۋرالى جىر» ءانىن شىرقادى.
مەرەكەلىك شارا كورەرمەندەرگە كوتەرىڭكى كوڭىل كۇي مەن ەرەكشە اسەر سىيلادى.