بۇگىن مەملەكەت باسشىسىنىڭ تاپسىرماسى بويىنشا سۋ تاسقىنىنا قارسى كۇرەستى ءتيىمدى ۇيلەستىرۋ ءۇشىن ق ر پرەمەر-مينيسترىنىڭ ءبىرىنشى ورىنباسارى رومان سكليار سولتۇستىك قازاقستان وبلىسىنا باردى. ول وڭىردەگى سۋ تاسقىنى جاعدايى بويىنشا جەدەل كەڭەس وتكىزدى، وعان وبلىس اكىمى عاۋەز نۇرمۇحامبەتوۆ پەن مەملەكەتتىك ورگانداردىڭ باسشىلارى قاتىستى.
كەڭەستە سقو توتەنشە جاعدايلار دەپارتامەنتىنىڭ باسشىسى ەرىك سارىبايەۆ، «قازگيدرومەت» سقوف ديرەكتورى قىمبات مەرعاليموۆا جانە «قازاۆتوجول» اق فيليالىنىڭ ديرەكتورى اقىلبەك قابىلدين سۋ تاسقىنىنىڭ جاعدايى تۋرالى بايانداما جاسادى.
وبلىستا سۋ تاسقىنى بويىنشا كۇردەلى جاعداي قالىپتاسۋدا. سۋ دەڭگەيىنىڭ كۇرت كوتەرىلۋى كريتيكالىق دەڭگەيدەن جوعارى بولادى دەپ كۇتىلۋدە. ءساۋىردىڭ 5-نەن باستاپ سەرگەيەۆ سۋ قويماسى تولىپ، ارناسىنان استى.
پەتروپاۆل قالاسىنىڭ ماڭىنداعى سۋ دەڭگەيىنىڭ العاشقى كوتەرىلۋى 6 كۇننەن كەيىن باستالىپ، ال سۋ تاسقىنىنىڭ شارىقتاۋ شەگى ءساۋىر ايىنىڭ اياعىندا بولادى دەپ كۇتىلۋدە.
رومان سكليار سۋ تاسقىنىنىڭ كەلەڭسىز سەنارييىن بولدىرماۋ ءۇشىن بار كۇش-جىگەردى سالۋ كەرەكتىگىن اتاپ ءوتتى. اتاپ ايتقاندا، سۋ تاسقىنىنان زارداپ شەككەن ازاماتتارعا بارلىق قاجەتتى كومەكتى كورسەتۋ بويىنشا كەشەندى شارالاردى قولعا الۋ قاجەت. كومەكتىڭ تەز ارادا جانە قاعازباستىلىقسىز كورسەتىلگەنى ماڭىزدى.
كەڭەس قورىتىندىسى بويىنشا پرەمەر-مينيستردىڭ ءبىرىنشى ورىنباسارى وبلىس باسشىلىعىنا تۇرعىنداردى ەۆاكۋاسيالاۋ پۋنكتتەرىن دايىنداۋدى، ازىق-تۇلىك جانە دارى-دارمەكپەن قامتاماسىز ەتۋدى، تۇرعىندار اراسىندا تاسقىن كەزىندەگى ەرەجەلەر بويىنشا ءتۇسىندىرۋ جۇمىستارىن جالعاستىرۋدى، قاپتاردى ينەرتتى ماتەريالمەن تولتىرۋدى، ەگىستىكتەردە ەرىگەن سۋدىڭ جينالۋىن ۇنەمى باقىلاۋدى، كۇشتەر مەن قۇرالداردىڭ تاۋلىك بويى دايىندىعىن قامتاماسىز ەتۋدى، ىقتيمال سۋ تاسقىنىن جويۋ ءۇشىن سەرگەيەۆ، شاعالالى جانە سىلەتى سۋ قويمالارىنان سۋدىڭ اعۋىنا تاۋلىك بويى مونيتورينگ جۇرگىزۋدى تاپسىردى.
