Búgin Memleket basshysynyń tapsyrmasy boiynsha sý tasqynyna qarsy kúresti tiimdi úilestirý úshin QR Premer-Ministriniń birinshi orynbasary Roman Skliar Soltústik Qazaqstan oblysyna bardy. Ol óńirdegi sý tasqyny jaǵdaiy boiynsha jedel keńes ótkizdi, oǵan oblys ákimi Ǵaýez Nurmuhambetov pen memlekettik organdardyń basshylary qatysty.
Keńeste SQO Tótenshe jaǵdailar departamentiniń basshysy Erik Sarybaev, «Qazgidromet» SQOF direktory Qymbat Merǵalimova jáne «QazAvtoJol» AQ filialynyń direktory Aqylbek Qabyldin sý tasqynynyń jaǵdaiy týraly baiandama jasady.
Oblysta sý tasqyny boiynsha kúrdeli jaǵdai qalyptasýda. Sý deńgeiiniń kúrt kóterilýi kritikalyq deńgeiden joǵary bolady dep kútilýde. Sáýirdiń 5-nen bastap Sergeev sý qoimasy tolyp, arnasynan asty.
Petropavl qalasynyń mańyndaǵy sý deńgeiiniń alǵashqy kóterilýi 6 kúnnen keiin bastalyp, al sý tasqynynyń sharyqtaý shegi sáýir aiynyń aiaǵynda bolady dep kútilýde.
Roman Skliar sý tasqynynyń keleńsiz stsenariiin boldyrmaý úshin bar kúsh-jigerdi salý kerektigin atap ótti. Atap aitqanda, sý tasqynynan zardap shekken azamattarǵa barlyq qajetti kómekti kórsetý boiynsha keshendi sharalardy qolǵa alý qajet. Kómektiń tez arada jáne qaǵazbastylyqsyz kórsetilgeni mańyzdy.
Keńes qorytyndysy boiynsha Premer-Ministrdiń birinshi orynbasary oblys basshylyǵyna turǵyndardy evakýatsiialaý pýnktterin daiyndaýdy, azyq-túlik jáne dári-dármekpen qamtamasyz etýdi, turǵyndar arasynda tasqyn kezindegi erejeler boiynsha túsindirý jumystaryn jalǵastyrýdy, qaptardy inertti materialmen toltyrýdy, egistikterde erigen sýdyń jinalýyn únemi baqylaýdy, kúshter men quraldardyń táýlik boiy daiyndyǵyn qamtamasyz etýdi, yqtimal sý tasqynyn joiý úshin Sergeev, Shaǵalaly jáne Sileti sý qoimalarynan sýdyń aǵýyna táýlik boiy monitoring júrgizýdi tapsyrdy.
