مەملەكەت باسشىسىنىڭ باستاماسىمەن قولعا الىنعان «تازا قازاقستان» ەكولوگيالىق اكسياسىنىڭ «كيەلى مەكەن» اپتالىعىنا «سوزاق ورمان جانە جانۋارلار الەمىن قورعاۋ جونىندەگى مەملەكەتتىك مەكەمەسىنىڭ» قىزمەتكەرلەرى دە ءوز ۇلەستەرىن قوسىپ، بەلسەنە كىرىستى، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.
تابيعات جاناشىرلارى وڭىردەگى تاريحي-مادەني ەسكەرتكىشتەردى اباتتاندىرۋ ماقساتىندا اۋدان اۋماعىنداعى ورتا عاسىرلاردا سالىنعان كيەلى دە تاريحي «ىسقاق باب» كەسەنەسىنىڭ اۋماعىنا تازالىق جۇمىستارىن جۇرگىزدى. تازالىق شاراسىنا وبلىستىق تابيعي رەسۋرستار جانە تابيعاتتى پايدالانۋدى رەتتەۋ باسقارماسىنىڭ ورىنباسارى اقجايىق حامەتوۆا باستاعان 20-دان اسا ادام اتسالىستى.
اۋقىمدى شارا اياسىندا تاريحي ەسكەرتكىشتىڭ اۋلاسىنداعى اعاش تۇپتەرى اكتەلىپ، 70-كە جۋىق قاراعاش كوشەتى وتىرعىزىلدى. بۇل كوشەتتەر ورمان شارۋاشىلىعىندا جەرسىندىرىلىپ، دايىندالعان.
اتالعان مەكەمە، الداعى ۋاقىتتا دا اۋدان اۋماعىنا كىرەبەرىس اۋماققا كوگالداندىرۋ، تازالىق جۇمىستارىن جۇرگىزۋدى جوسپارلاپ وتىر.
ىسقاق باب كەسەنەسى – سوزاق اۋدانى، بابا اتا اۋىلىنىڭ سولتۇستىك شەتىندە ورنالاسقان. تۇركىستان ولكەسىندەگى بەدەلدى ءدىن يەلەرىنىڭ ءبىرى بولعان. ەل ۇلى عۇلامالىعىن قادىرلەپ، ءدىن قاقپاسى اتاندارعان ىسقاق باب – اۋليەلەردىڭ سۇلتانى اتانعان قوجا احمەت ءياساۋيدىڭ ءتۇپ اتاسى.
جالپى سىرلى سوزاق – تاريحي ەسكەرتكىشتەرگە تولعان تۋريزم مەكەنى. اۋدان ەجەلدەن تاريحي-مادەني ەسكەرتكىشتەر مەن قاسيەتتى كەسەنەلەرگە باي. جالپى اۋداندا مەملەكەت قورعاۋىنا الىنعان 19 تاريحي-مادەني ەسكەرتكىش بار.
ايتا كەتەيىك، باسقارماعا قاراستى سوزاق ورمان كمم مەكەمەسىندەگى 10 گەكتار سۋارمالى تۇقىمباقتا ەلدى مەكەندەردى كوگالداندىرۋعا قاجەتتى ءتۇرلى ساندىك اعاشتاردىڭ جانە اۋدانعا جەرسىنگەن اعاشتاردىڭ ونعا جۋىق ءتۇرى وسىرىلۋدە. بيىلعى جىلدىڭ كوكتەم ايلارىندا تۇركىستان قالاسىنىڭ اينالاسىن كوگالداندىرۋعا 10 مىڭ ءتۇپ قاراعاش پەن 65 مىڭ ءتۇپ سەكسەۋىل تەگىن ۇلەستىرىلدى. سونداي-اق سوزاق اۋدانىنا 22500 ءتۇپ كوشەت اۋدان ەلدى مەكەندەرىن كوگالدانىرۋ ءۇشىن مەكەمەنىڭ تۇقىمباعىنان بوساتىلىپ بەرىلدى.
