سوت دەپۋتات رۋسلان بەردەنوۆتىڭ ۇستىنەن شاعىمدانعان بۋكمەكەرلىك كەڭسەلەردىڭ تالابىن قاناعاتتاندىرۋدان باس تارتتى، - دەپ حابارلايدى Dalanews.kz
سوت شەشىمىمەن ىسكەرلىك بەدەلدى قورعاۋ تۋرالى تالاپتى قاناعاتتاندىرۋدان باس تارتىلدى. استانا قالاسىنىڭ ازاماتتىق ىستەر جونىندەگى اۋدانارالىق سوتى "قازاقستان بۋكمەكەرلەر اسسوسياسياسى" زاڭدى تۇلعالار بىرلەستىگىنىڭ جاۋاپكەر ب.-عا قاتىستى اقپاراتتى جالعان جانە زاڭدى تۇلعالاردىڭ ىسكەرلىك بەدەلىنە نۇقسان كەلتىرەدى دەپ تانۋ تۋرالى تالاپ قويۋى بويىنشا ازاماتتىق ءىستى قارادى.
تالاپ قويۋ جاۋاپكەردىڭ اقپارات پورتالى ارقىلى ازاماتتاردىڭ قۇمار ويىندارعا جۇمساعان قاراجاتى تۋرالى بىرنەشە رەت جالعان اقپارات تاراتقانى، دۇنيەجۇزىلىك دەنساۋلىق ساقتاۋ ۇيىمى قۇمار ويىندارعا تاۋەلدىلىكتى اۋرۋ دەپ تانىعانى، الايدا سوعان قاراماستان بۋكمەكەرلىك كەڭسەلەر جارنامالاۋدى جالعاستىرۋدا دەپ كورسەتكەنىمەن ۋاجدەلگەن.
داۋلى باسىلىمداردا اسسوسياسيا مەن ونىڭ مۇشەلەرىنىڭ ىسكەرلىك بەدەلى تومەندەدى دەگەن قورىتىندى جاساۋعا مۇمكىندىك بەرەتىن اقپارات بولماعاندىقتان، سوت تالاپ قويۋدى قاناعاتتاندىرۋدان باس تارتتى. جاريالانىمداردا باعىتتالعان ناقتى مەكەن-جاي كورسەتىلمەگەن.
فيلولوگيالىق-پسيحولوگيالىق سراپتاما قورىتىندىسى بويىنشا اسسوسياسيا مەن ونىڭ مۇشەلەرىنە قاتىستى تەرىس اقپارات جوق ەكەنى انىقتالدى.
بۇل تۇجىرىمدار سوتتا جوققا شىعارىلمادى. شەشىم زاڭدى كۇشىنە ەنگەن جوق.
ايتا كەتەيىك، بۇعان دەيىن "قازاقستان بۋكمەكەرلەر قاۋىمداستىعى" سالانى مونوپوليالاندىرۋ جانە وعان وكم ۇلگىسى بويىنشا "تەسپەي سوراتىن" قۇرىلىم قۇرۋ يدەياسىن ۇسىنعان دەپۋتاتتى سوتقا بەرەدى.
ءماجىلىس دەپۋتاتتارى 5 ماۋسىمدا ەكىنشى وقىلىمدا "ويىن بيزنەسى، لوتەرەيا جانە لوتەرەيا قىزمەتى ماسەلەلەرى بويىنشا" زاڭ جوباسىن قابىلدادى. ءاۋ باستا ماجىلىسمەندەر كەز كەلگەن قۇرىلىمعا ۇزىلدى-كەسىلدى قارسى شىقتى. قۇمار ويىن جونىندەگى جۇمىس توبىنىڭ جەتەكشىسى ەلنۇر بەيسەنبايەۆ ستاۆكالاردى ەسەپكە الۋ ورتالىعىن "ەسكى قازاقستاننان" ىقپالدى لوببيستەرىنىڭ ايلا-امالى دەپ مىنبەردەن مالىمدەگەن بولاتىن.
