شىعىس قازاقستان ايماقتىق كوممۋنيكاسيالار قىزمەتىندە وتكەن باسپا ءسوز ءماسليحاتىندا شقو مەملەكەتتىك ەڭبەك ينسپەكسياسى باسقارماسىنىڭ باسشىسى باقىتبەك قيزاتوۆ ءمالىم ەتكەندەي، اتالمىش اكسيا بارىسىندا 445 تەكسەرۋ جۇرگىزىلگەن.
– «ۋاقىتىلى جالاقى» اكسياسىن ىسكە اسىرۋدا وبلىس پروكۋراتۋراسى جانە شقو مەملەكەتتىك ەڭبەك ينسپەكسياسى بىرلەسە جۇرگىزگەن تەكسەرۋ جۇمىستارىنىڭ ناتيجەسى بويىنشا 272 ەسكەرتۋ جاسالىپ، 197 اكىمشىلىك ايىپپۇل سالىندى. ايىپپۇلدىڭ جالپى كولەمى 23،6 ملن تەڭگە قۇراپ وتىر. وسىلايشا، قىزمەتكەرلەرىنە جالاقى تولەمەگەن جۇمىس بەرۋشىلەر 260 ملن تەڭگە كولەمىندەگى قارىزدى تولىقتاي قايتاردى، – دەدى باقىتبەك قيزاتوۆ.
ايتا كەتسەك، جۇمىسكەرلەردىڭ جالاقىسىن ۇزاق ۋاقىت تولەمەي، قارىزعا بەلشەدەن باتقان كومپانيالار اراسىندا «ۆوستوكماشزاۆود» اق مەن «اديل» اق سياقتى ءىرى كاسىپورىندار دا بار بولىپ شىقتى. اكسيا بارىسىندا بۇل كومپانيالار دا بەرەشەك سومماسىن تولىق وتەدى.
