شاھاردا بوي كوتەرگەن حالىقارالىق دارەجەگى ەسكەك ەسۋ كانالىنىڭ نەگىزگى قۇرىلىس جۇمىستارى جىل سوڭىنا دەيىن اياقتالۋى ءتيىس. قۇرىلىس الاڭىندا بولعان وبلىس اكىمى ءومىرزاق ەستاي ۇلى جاۋاپتى باسىلارعا ەسكەرتتى.
ەلىمىزدە تەڭدەسى جوق وليمپيادالىق سۋ كەشەنى 80 گەكتار القاپقا جايعاسقان.
ساپبوردينگ، سۋ شاڭعىسى، فلايبوردينگ، ۆەيكسەرفينگ، كانوپولو، دراگونبوت جانە جاعاجاي ويىندار فۋتبولى، ۆولەيبول، گاندبول، تەننيس، رەگبي سەكىلدى سۋ جانە جاعاجاي سپورتىنىڭ تانىمال تۇرلەرىن دامىتۋعا سەپتىگىن تيگىزەتىن سپورت كەشەنىندە كەڭسەلەر، قوناق ۇيلەر، ساۋدا ورتالىقتارى، كافەلەر، سپورت جانە ويىن الاڭدارى، اكۆاپارك، بالالار اتتراكسيوندارى جانە تاعى باس نىساندار ورنالاسادى.
بۇگىندە مۇندا 1،7 ملن تەكشە مەتر توپىراق قازىلىلىپ، نىعىزدالىپ، قايتا توسەلۋدە. بەتونداۋ جۇمىستارى ءجۇرىپ جاتىر.
تۇركىستاندا سونىمەن قاتار، «TURAN» فۋتبول اكادەمياسى سالىنىپ جاتىر. 20 گەكتار جەردە قۇرىلىسى باستالعان فۋتبول اكادەمياسىنىڭ ينفراقۇرىلىمى الەمدىك ستاندارتتارعا سايكەس، مۇندا سپورتشىلارعا ەۋروپانىڭ ۇزدىك كلۋبتارىنداعىداي جاعداي جاسالاتىن بولادى. جاڭا كەشەندە ەۋروپالىق ستاندارتقا سايكەس كەلەتىن 11 ۇلكەن جانە شاعىن فۋتبول الاڭى، جاساندى جابىن، تولىق سۋارۋ جانە درەناج جۇيەسى بار.
وبلىس ورتالىعىندا ات سپورتى كەشەنى دە سالىنۋدا. 35 گەكتار جەردە ورنالاسقان كەشەندە پولو-كلۋب، مانەج، ستەندتىك اتىسقا ارنالعان الاڭقاي، ساداق اتۋعا ارنالعان الاڭ، كانال ارقىلى وتەتىن كوپىر مەن اتپەن سەرۋەندەۋ ايماعى بولادى. وبلىس باسشىسى سونىمەن بىرگە جاقىن كۇندەرى اشىلاتىن ەكوبازاردا بولىپ، ونداعى ينفراقۇرىلىم جۇرگىزۋ جۇمىستارىمەن تانىستى.
