جاقىن ۋاقىتتا شىمكەنت مۇناي وڭدەۋ زاۋىتىنداعى جاڭعىرتۋ جۇمىستارىنىڭ ءبىرىنشى كەزەڭى اياقتالادى دەپ كۇتىلۋدە. ەلىمىزدەگى مۇناي وڭدەيتىن ەڭ ءىرى ءۇش زاۋىتتىڭ ءبىرى سانالاتىن وندىرىستە بۇگىندە قۇرىلىس جۇمىستارى قارقىندى جۇرگىزىلىپ جاتىر.

كاسىپورىن مۇنداي مۇمكىندىككە ەلىمىزدەگى ۇدەمەلى يندۋستريالدى يننوۆاسيالىق دامۋ باعدارلاماسىنىڭ اياسىندا قول جەتكىزىپ وتىر. جاڭعىرتۋ جۇمىستارىنىڭ نەگىزىندە زاۋىت جىلىنا 4 مىڭ توننا كۇكىرت شىعارۋعا قاۋقارلى بولادى. مۇناي ونىمدەرىن ساڭلاۋسىز قۇيۋ كەشەنىنىڭ  دە قۇرىلىسى اياقتالعان. ناتيجەسىندە زاۋىتتاعى جانارماي مەن ديزەل وتىنىنىڭ ساپاسى ەۋرو-4 جانە ەۋرو-5 ستاندارتىنا سايكەستەندىرىلمەك.

ال، جاڭعىرتۋ جۇمىستارىنىڭ ەكىنشى كەزەڭىندە زاۋىتتىڭ ءونىم شىعارۋ كولەمىن جىلىنا 6 ملن. تونناعا دەيىن جەتكىزۋ جانە مۇناي وڭدەۋ تەرەڭدىگىن 80 پايىزعا دەيىن كوبەيتۋ كوزدەلىپ وتىر. جوبا تولىق جۇزەگە اسقان كەزدە ەلىمىزدەگى مۇناي وڭدەۋ زاۋىتى الەمدىك تالاپتارعا تولىق جاۋاپ بەرەتىن جوعارى تەحنولوگيالى ءىرى ءوندىرىس ورنىنا اينالاتىن بولادى.

ستراتەگيالىق ماڭىزى بار جوبانى «قازاقستاننىڭ دامۋ بانكى» قارجىلاندىرىپ وتىر. ياعني بانك پەن زاۋىت اراسىنداعى كەلىسىمگە ساي  قايتا جوندەۋ جوباسىن قارجىلاندىرۋ ءۇشىن نەسيە جەلىسى اشىلعان بولاتىن.

13 جىلعا دەيىنگى مەرزىمگە بەرىلگەن نەسيەنىڭ جالپى سوماسى 932 ملن اقش دوللارىن قۇرايدى.  جالپى قۇنى 1،9 ملرد اقش دوللارى بولاتىن جوبا يندۋستريالىق-يننوۆاسيالىق دامۋدىڭ 2015-2019 جىلدارعا ارنالعان مەملەكەتتىك باعدارلاماسى اياسىندا قارجىلاندىرىلۋدا.

شىمكەنت مۇناي وڭدەۋ زاۋىتىن جاڭعىرتۋ جانە قايتا جوندەۋ ەكى كەزەڭمەن جۇزەگە اسىرىلۋدا. ءبىرىنشى كەزەڭدە كەدەن وداعى ەلدەرىندە قابىلدانعان ك4 جانە ك5 (ەۋرو-4 جانە ەۋرو-5 بالاماسى) ەكولوگيالىق كلاستى بەنزين مەن ديزەل وتىنىن شىعارۋدى رەتتەۋ جوسپارلانعان، ەكىنشى كەزەڭدە مۇناي وڭدەۋ تەرەڭدىگىن، سونداي-اق قۋاتىن جىلىنا 5،250 ملن توننادان 6 ملن تونناعا دەيىن ۇلعايتۋ جوسپارلانعان.

 

وقو اكىمىنىڭ باسپا ءسوز قىزمەتى