ءوڭىر باسشىسى كۇتپەگەن جەردەن رىسقۇلوۆ پەن دۋلاتي كوشەلەرىنىڭ قيىلىسىندا ورنالاسقان «قازىبەك» امبەباپ بازارىنا ايالدادى. بازار ماڭىنداعى قۇجىناعان حالىق پەن ەشقانداي سانيتارلىق تالاپتارعا جاۋاپ بەرمەيتىن جۇيەسىز ساۋدا رەتتەرىن كورگەن اكىم بازار جىل سوڭىنا دەيىن قالا سىرتىنا كوشىرىلەتىنىن ايتتى. سونداي-اق ەلباسىنىڭ تاپسىرماسىنا سايكەس شىمكەنتتى ءىرى مەگاپوليسكە اينالدىرۋ بويىنشا جاڭا جوبالاردىڭ قولعا الىنىپ جاتقانىنا توقتالدى. اتالعان بازاردى قالا سىرتىنا كوشىرۋدى جىل سوڭىنا دەيىن شەشۋدى قالا باسشىلىعىنا تاپسىردى.
«قازىرگى تالاپتارعا سايكەس بۇل بازار قالا سىرتىنا كوشىرىلەتىن بولادى. سوندىقتان مۇنداعى ساۋدا جاساپ جاتقان كاسىپكەرلەر تۇسىنىستىكپەن قاراپ، بىزگە قولداۋ ءبىلدىرۋى قاجەت. ساۋداگەرلەر دالادا قالمايدى. بارىنە زاڭ تالاپتارىنا ساي زاماناۋي ۇلگىدە سالىنىپ جاتقان بوزارىق شاعىن اۋدانىنداعى ساۋدا ورتالىعىنان ورىن بەرىلەتىن بولادى. سوندىقتان اتالعان بازاردى جىل سوڭىنا دەيىن جاۋىپ، كوشىرۋدى تاپسىرامىن»، - دەدى جانسەيىت تۇيمەبايەۆ.
وبلىس اكىمىنىڭ بۇل تالابىنا سونداعى ساتۋشىلار دە قولداۋ ءبىلدىرىپ، كوشۋگە بايلانىستى ەسكەرتۋ شارالارىنىڭ دەر كەزىندە ءجۇرىپ جاتقاندىعىن جەتكىزدى.
«جەرگىلىكتى بيلىك قويىپ وتىرعان تالاپتار وتە ورىندى. مىناداي بازاردا قىستىڭ سۋىعى مەن جازداعى اپتاپ ىستىقتا تۇرىپ ساۋدا جاساۋ ايتارلىقتاي قيىندىقتار تۋدىرادى. سوندىقتان ءبىز كوشۋگە ءازىرمىز. تەك جاڭا بازاردان ورىن بەرسەڭىزدەر بولعانى» دەدى ءبىر توپ ساتۋشىلار.
«قازىبەك» امبەباپ بازارىندا جەمىس-جيدەك، كوكونىس پەن كۇندەلىكتى تۇتىنۋعا ارنالعان جانە قۇرىلىسقا قاجەتتى تاۋارلار ساۋدالانادى. ساۋدا ورتالىعىنىڭ جالپى اۋماعى 20 595 شارشى مەتردى قۇرايدى. ونىڭ ىشىندە 10 719 شارشى مەترى ساۋدا الاڭىنا جاتادى.
