شىمكەنت پوليسيا دەپارتامەنتىنە جاڭا باسشى كەلدى، دەپ حابارلايدى Dalanews.kz.
ىشكى ىستەر ءمينيسترى ەرجان سادەنوۆ شىمكەنت پوليسيا دەپارتامەنتىندە كوشپەلى كەڭەس وتكىزدى.
جيىن بارىسىندا ءىىم باسشىسى جەكە قۇرامعا شىمكەنت پوليسيا دەپارتامەنتىنىڭ جاڭا باسشىسى مۇحتار قوجايەۆتى تانىستىردى.
"ول بۇعان دەيىن ءىىم تەرگەۋ دەپارتامەنتىن باسقارعان. پوليسيا گەنەرال-مايورىنىڭ باسقارۋ، تەرگەۋ سالاسىندا مول تاجىريبەسى بارى، تەرگەۋشىدەن باستاپ ورتالىق اپپارات دەپارتامەنتى باسشىسىنا دەيىنگى قىزمەت جولىنان وتكەنى ايتىلدى"، - دەپ جازىلعان حابارلامادا.
ەسكە سالا كەتەيىك، بۇعان دەيىن ۇلتتىق قۇرىلتاي بارىسىندا مەملەكەت باسشىسى شىمكەنتتەگى سوڭعى وقيعالارعا بايلانىستى ىشكى ىستەر مينيسترلىگىنە ءبىرقاتار تاپسىرما بەرگەن بولاتىن.
قىزمەتتىك تەكسەرىس قورىتىندىسى بويىنشا قۇقىقتىق ءتارتىپتى ءتيىستى دەڭگەيدە قامتاماسىز ەتپەگەنى ءۇشىن پوليسيا دەپارتامەنتىنىڭ باستىعى مەن ونىڭ ءبىرقاتار ورىنباسارى قىزمەتتەرىنەن بوساتىلىپ، سونداي-اق، اۋداندىق بولىنىستەردىڭ كەيبىر باسشىلارى ىشكى ىستەر ورگاندارىنان شىعارىلدى.
