ارمەنيانىڭ ۇقشۇ-عا قاتىسۋىن توقتاتۋ تۋرالى مالىمدەمەگە بەلارۋس پرەزيدەنتى الەكساندر لۋكاشەنكو تۇسىنىكتەمە بەردى، دەپ حابارلايدى Dalanews.kz.
"ءبىز بۇعان سابىرلىقپەن قارايمىز. بۇل ماسەلەنى قازاندا پرەزيدەنتتەرمەن تالقىلاعان بولاتىنبىز. ەشكىم ەسىنەن الجاسقان جوق. ءبىز ەشكىمدى قۋىپ جاتقانىمىز جوق. كەرىسىنشە ءاردايىم قولداۋ بىلدىرەمىز. بۇعان دەيىن دە وداقتاسىمىزدى قولداپ كەلدىك جانە قولداي بەرەمىز. ولار ۇقشۇ قۇرامىندا بولعىسى كەلمەيدى. ولاردىڭ بۇل شەشىمىنەن كەيىن ۇقشۇ، ارينە، قۇلامايدى جانە ىدىراپ كەتپەيدى"، - دەدى لۋكاشەنكو.
ول ازىرگە ارمەنيانىڭ ۇقشۇ-دان شىعاتىنى تۋرالى رەسمي مالىمدەمە بولماعانىن جەتكىزدى. سونىمەن قاتار ارمەنيانىڭ ۇقشۇ-عا مۇشە بولۋ ماسەلەسى پارلامەنتتە شەشىلۋى كەرەك ەكەنىن دە اتاپ ءوتتى.
"مۇندا پاشينيان كىرۋ نەمەسە شىعۋ تۋرالى شەشىم قابىلداي المايدى. ونى پارلامەنت شەشەدى. مەنىڭ ويىمشا، ارمەنيا پارلامەنتىندە كوپشىلىگى سانالى ادام. بىزگە، ۇقشۇ-عا قارسى نارازىلىق بولۋى مۇمكىن ەمەس"، - دەدى بەلارۋس كوشباسشىسى.
تاۋلى قاراباقتاعى ەريەۆان مەن باكۋ اراسىنداعى قاقتىعىسقا توقتالعان لۋكاشەنكو ءازىربايجان ۇقشۇ-نىڭ مۇشەلەرى ءۇشىن بوتەن مەملەكەت ەمەس ەكەنىن العا تارتتى.
"ۇقشۇ-دا كوپتەگەن مۇسىلمان ەلى بار. مۇنى ءبارى بىلەدى. سوعان سايكەس پوزيسيا ءىشىنارا بولىپ كەلەدى. ۇشىنشىدەن، ارمياندار ارمەنيا مەن ءازىربايجان اراسىنداعى سوعىسقا ارالاسۋىمىزدى قالادى ما؟ مۇنداي جاعدايدا سوعىس ءالى دە جالعاسىن تاۋىپ، مىڭداعان ادامنىڭ ولىمىنە سەبەپكەر بولاتىن ەدى»، - دەدى بەلارۋس باسشىسى. "وكىنىشكە قاراي، ازەربايجان مەن ارمەنيا سوعىس ارقىلى سۇراقتىڭ دۇرىس شەشىمىن تاپتى. ارمەنيا (ولار دا مويىندادى) ءازىربايجاننىڭ بەس-التى ايماعىن باسىپ الدى."
"سوعىستى اياقتادىق. ءبىزدىڭ پوزيسيامىز قانداي بولۋى كەرەك؟ ءيا، ارمياندار - جاقىندارىمىز، قىمباتتى حالقىمىز. ال ءازىربايجان بوتەن ەل مە؟ وسى تۇستا ءبىز ىڭعايسىز جاعدايعا تاپ بولدىق. مۇندا ۇقش-نىڭ قاقتىعىسقا ارالاسۋىنا ەشقانداي سەبەپ بولعان جوق»، - دەدى لۋكاشەنكو.
ول تاعى ءبىر مارتە قولدا باردا التىننىڭ ءقادىرىن تۇسىنۋگە شاقىردى.
"شىعۋ وڭاي، الايدا كىرۋ قيىن بولادى. بۇعان تاعى دا گرۋزيا ەلىن مىسال رەتىندە الايىق. ول تمد مەن باسقا دا قۇرىلىمداردان شىعىپ كەتتى. بۇل قادام وعان جاقسىلىق اكەلدى مە؟ ارينە، جوق. قايتىپ ورالعانى ءجون. ءبىراق قايتىپ كەلۋ ءارقاشان قيىندىق تۋدىرادى»، - دەدى بەلارۋس پرەزيدەنتى.
لۋكاشەنكو ارمياندارعا اسىعىس شەشىم قابىلداماۋعا كەڭەس بەردى.
"اسىقپاڭىزدار. بىردەن شىعىپ كەتۋدىڭ قاجەتى جوق. ۋاقىت كوپ نارسەنى وزگەرتەدى. وسى تۇستا ارمەنيا مەن ءازىربايجان توڭىرەگىندەگى جاعداي دا وزگەرەدى. جالپى الەمدە وزگەرىستەر بولادى. سوندىقتان ارمەنيا، بەلارۋس جانە ت.ب.شاعىن مەملەكەتتەر بىردەن اسىعىس شەشىم قابىلداماعانى ءجون. مۇز جۇقا بولعاندىقتان، بىردەن قۇلايمىز. ەشكىم قۇتقارا المايدى. كەرىسىنشە، ولار سول جەردە تۇنشىعىپ قالاتىنداي ارى قاراي يتەرۋگە تىرىسادى. سوندىقتان ارمياندار اسىقپاسىن. مەنىڭ ويىمشا، نيكول ۆوۆايەۆيچ جاي عانا اسىعىستىق تانىتىپ، ەموسياعا بەرىلىپ مالىمدەمە جاساعان سياقتى"، - دەپ ءسوزىن قورىتىندىلادى لۋكاشەنكو.
ەسكە سالايىق، بۇعان دەيىن ارمەنيا پرەمەر-مينيسترى نيكول پاشينيان ەريەۆاننىڭ ۇقشۇ-عا مۇشەلىگىن توقتاتقانىن مالىمدەگەن بولاتىن. باق-قا بەرگەن سۇحباتىندا ول ارمەنياعا قاتىستى ۇجىمدىق قاۋىپسىزدىك تۋرالى شارت ورىندالماعانىن اتاپ ءوتتى.
"ءبىزدىڭ ويىمىزشا، ارمەنياعا قاتىستى ۇجىمدىق قاۋىپسىزدىك تۋرالى شارت، اسىرەسە، 2021-2022 جىلدارى ورىندالمادى. بۇل ماسەلە ءبىزدىڭ نازارىمىزدان تىس قالمادى. ءبىز وسى شارتقا قاتىسۋدى توقتاتتىق. ارى قاراي نە بولاتىنىن كورەيىك"، - دەدى پاشينيان سۇحباتىندا.
