شەرزات پولاتتىڭ قازاسىنا قاتىستى ءىس بويىنشا سوتتالعان سەگىز ازامات ۇكىمگە اپەللياسيالىق شاعىم ءتۇسىردى. بۇل تۋرالى جابىرلەنۋشى تاراپتىڭ ادۆوكاتى مەيىرمان شەكەيەۆ ءمالىم ەتتى، دەپ حابارلايدى Dalanews.kz.
ادۆوكاتتىڭ ايتۋىنشا، اتالعان شاعىم 2025 جىلدىڭ 18 تامىزى كۇنى ساعات 11:00-دە الماتى وبلىستىق سوتىندا قارالادى.
“سوتتالعان 8 ادام اپەللياسيالىق شاعىم ءتۇسىردى. ەندى ولاردىڭ ءىسى وبلىستىق دەڭگەيدە قايتا قارالادى”، — دەدى مەيىرمان شەكەيەۆ.
بيىل 5 ماۋسىمدا تالعار اۋداندىق سوتىندا كىسى قولىنان قازا تاپقان ءجاسوسپىرىم شەرزات پولاتتىڭ ولىمىنە قاتىستى ۇكىم شىققان بولاتىن. سوت پروسەسىن سۋديا ەرجان جانۇزاقوۆ جۇرگىزدى.
سوت ۇكىمىمەن:
- ابزال شىناسىل – 23 جىلعا،
- راۆيل ساكييەۆ – 20 جىلعا،
- ازامات توقتاۋبايەۆ – 15 جىلعا،
- نۇرقياس ءىلياسوۆ – 9 جىلعا (بۇعان دەيىنگى 2،5 جىل شەكتەۋ جازاسىن ەسكەرە وتىرىپ)،
- شىڭعىس بەلعوجايەۆ، دارحان اسكەنتاي، نۇربول توقتاۋبايەۆ، ديدار قالياحمەت – ءارقايسىسى 7 جىلعا سوتتالدى،
ال دۋمان ىسقاق ق ر قىلمىستىق كودەكسىنىڭ 434-بابى (اۋىر قىلمىس جاسالعانىن حابارلاماۋ) بويىنشا 1،5 جىلعا باس بوستاندىعىنان ايىرىلدى. ونىڭ يزولياتورداعى ءبىر كۇنى ەكى كۇن رەتىندە ەسەپتەلەتىن بولدى.
