اتالمىش ءبىلىم بەرۋ ورتالىعى ءبىرىنشى كەزەكتە دارىندى وقۋشىلاردىڭ شىعارماشىلىق الەۋەتىن انىقتاۋ جانە دامىتۋدى كوزدەپ وتىر.
بۇل ورتالىق وڭىرگە قاجەتتى ماماندىقتاردى تاڭداۋعا بەيىمدەي وتىرىپ، وقۋشىلاردىڭ تۋعان ولكە ەكونوميكاسىن دامىتۋعا جانە پاتريوتتىق رۋحتا تاربيەلەۋگە، ءبىلىم بەرۋ جۇيەسىنىڭ ساپاسىن ارتتىرۋعا قىزمەت ەتەتىن بولادى.
جاڭا نىساننىڭ اشىلۋ سالتاناتىندا اۋدان اكىمى بولاتبەك قىستاۋوۆ، ارداگەر ۇستاز، اۋداننىڭ قۇرمەتتى ازاماتى جامال تولەشوۆا قۇتتىقتاۋ ءسوز سويلەپ، حالىقتىڭ يگىلىگىنە قىزمەت ەتە بەرسىن دەگەن تىلەكتەرىن ءبىلدىردى.
نىساننىڭ لەنتاسى قيىلىپ بولعان سوڭ قوناقتار جاڭا ءبىلىم بەرۋ ورتالىعىنىڭ ءىشى-سىرتىن ارالاپ، جۇمىس جۇيەسىمەن تانىستى. «بولاشاق» ءبىلىم بەرۋ ورتالىعىنىڭ اتقارۋشى ديرەكتورى اپپازبەك ىلەسوۆتىڭ ايتۋىنشا مۇندا 4-11 سىنىپ وقۋشىلارى قابىلدانىپ، ولاردى ارنايى ەducon باسپاسى وقۋلىقتارىمەن وقىتۋ كوزدەپ وتىر. 4،5،6 سىنىپ وقۋشىلارىن نازاربايەۆ زياتكەرلىك مەكتەبىنە، ءبىلىم يننوۆاسيالىق ليسەيىنە جانە دارىن مەكتەپتەرىنە كەشەندى تۇردە دايىنداسا، 7-9 سىنىپ وقۋشىلارىن مەكتەپ باعدارلاماسىمەن وقىتادى. 10 -11 ءبىتىرۋشى تۇلەكتەردى «بولاشاق» ءبىلىم بەرۋ ورتالىعى ارقىلى جوعارى وقۋ ورىندارىنا تۇسەتىن تالاپكەرلەردىڭ ۇلتتىق ءبىرىڭعاي تەستىلەۋگە دايىندىعىن نىعايتۋ ماقساتىندا بەيىندى پاندەر بويىنشا دايىندالۋعا مۇمكىندىك بەرەدى.
جاڭا ورتالىقتا ءقازىردىڭ وزىندە 40-تان استام وقۋشى قابىلدانىپ، ولارعا 5 ءمۇعالىم ساباق بەرۋدە. زاماناۋي ۇلگىدە جاراقتالعان قوسىمشا ءبىلىم بەرۋ ورتالىعىندا ءار وقۋشىعا ايىنا 52 ساعات بولىنەدى. وقۋشىلاردىڭ اتا-اناسى بۇل ءۇشىن ايىنا 15 مىڭ تەڭگە تولەيدى. باستاپقى كەزدە 120 بالاعا دەيىن قابىلداناتىنىن ايتقان اپپازبەك ىلەسوۆ الداعى ۋاقىتتا ورتالىقتىڭ اياسىن كەڭەيتە وتىرىپ، وقۋشى سانىن ارتتىراتىنىن دا جەتكىزدى.
سالتاناتتى شاراعا كەلگەن قوناقتار مەن اتا-انالار قاۋىمى بالالاردىڭ جان-جاقتى ءبىلىم الۋىنا جاعداي جاسايتىن ورتالىقتىڭ كەلەشەگى جارقىن، جاس ۇرپاق ءۇشىن ماڭىزى زور دۇنيە بولاتىنىنا ۇلكەن سەنىم ارتىپ وتىر.
شاردارا اۋدان اكىمىنىڭ باسپا ءسوز قىزمەتى
