Atalmysh bilim berý ortalyǵy birinshi kezekte daryndy oqýshylardyń shyǵarmashylyq áleýetin anyqtaý jáne damytýdy kózdep otyr.
Bul ortalyq óńirge qajetti mamandyqtardy tańdaýǵa beıimdeı otyryp, oqýshylardyń týǵan ólke ekonomıkasyn damytýǵa jáne patrıottyq rýhta tárbıeleýge, bilim berý júıesiniń sapasyn arttyrýǵa qyzmet etetin bolady.
Jańa nysannyń ashylý saltanatynda aýdan ákimi Bolatbek Qystaýov, ardager ustaz, aýdannyń Qurmetti azamaty Jamal Tóleshova quttyqtaý sóz sóılep, halyqtyń ıgiligine qyzmet ete bersin degen tilekterin bildirdi.
Nysannyń lentasy qıylyp bolǵan soń qonaqtar jańa bilim berý ortalyǵynyń ishi-syrtyn aralap, jumys júıesimen tanysty. «Bolashaq» bilim berý ortalyǵynyń atqarýshy dırektory Appazbek İlesovtiń aıtýynsha munda 4-11 synyp oqýshylary qabyldanyp, olardy arnaıy Educon baspasy oqýlyqtarymen oqytý kózdep otyr. 4,5,6 synyp oqýshylaryn Nazarbaev zıatkerlik mektebine, Bilim ınovasıalyq lıseıine jáne Daryn mektepterine keshendi túrde daıyndasa, 7-9 synyp oqýshylaryn mektep baǵdarlamasymen oqytady. 10 -11 bitirýshi túlekterdi «Bolashaq» bilim berý ortalyǵy arqyly joǵary oqý oryndaryna túsetin talapkerlerdiń Ulttyq biryńǵaı testileýge daıyndyǵyn nyǵaıtý maqsatynda beıindi pánder boıynsha daıyndalýǵa múmkindik beredi.
Jańa ortalyqta qazirdiń ózinde 40-tan astam oqýshy qabyldanyp, olarǵa 5 muǵalim sabaq berýde. Zamanaýı úlgide jaraqtalǵan qosymsha bilim berý ortalyǵynda ár oqýshyǵa aıyna 52 saǵat bólinedi. Oqýshylardyń ata-anasy bul úshin aıyna 15 myń teńge tóleıdi. Bastapqy kezde 120 balaǵa deıin qabyldanatynyn aıtqan Appazbek İlesov aldaǵy ýaqytta ortalyqtyń aıasyn keńeıte otyryp, oqýshy sanyn arttyratynyn da jetkizdi.
Saltanatty sharaǵa kelgen qonaqtar men ata-analar qaýymy balalardyń jan-jaqty bilim alýyna jaǵdaı jasaıtyn ortalyqtyń keleshegi jarqyn, jas urpaq úshin mańyzy zor dúnıe bolatynyna úlken senim artyp otyr.
Shardara aýdan ákiminiń baspasóz qyzmeti
