سەناتورلار سالىق كودەكسىنە وزگەرىستەر ەنگىزدى، دەپ حابارلايدى Dalanews.kz.
بۇگىنگى وتىرىستا سەنات ءتوراعاسى ماۋلەن اشىمبايەۆ كودەكس تالقىلانعان كەزدە دەپۋتاتتارعا بيزنەس وكىلدەرى جۇگىنگەنىن ايتتى. ولار زاڭنىڭ كەيبىر تۇستارىنا قاتىستى ۇكىمەتپەن كەلىسپەيتىنىن بىلدىرگەن. سونداي-اق ينۆەستورلارعا جاعداي جاساۋ، ولاردى تارتۋ مەن سۇيەمەلدەۋ تەتىكتەرىنىڭ تيىمدىلىگى بويىنشا سەناتتا قىزۋ پىكىرتالاستار بولعانى اتاپ ءوتىلدى.
سەنات كوميتەتتەرى مەملەكەتتىك ورگاندارمەن، كاسىپكەرلەرمەن جانە ساراپشىلارمەن بىرلەسىپ، ءاربىر ۇسىنىلعان نورما بويىنشا قارقىندى ءارى اۋقىمدى جۇمىس جۇرگىزدى. بۇل پروسەستىڭ بارلىعى اشىق وتكەن.
وسى جۇمىستىڭ ناتيجەسىندە كودەكستەگى كەيبىر نورمالاردىڭ تەرىس سالدارىن ازايتىپ، ەلدەگى بيزنەس جۇرگىزۋ جاعدايىن جاقسارتۋعا باعىتتالعان ءبىرقاتار ۇسىنىس پەن تۇزەتۋلەر دايىندالدى.
سەناتورلار سالىق كودەكسىنىڭ تۇجىرىمدامالىق نەگىزىن قولداي وتىرىپ، ءبىرقاتار باپتارعا جاڭا رەداكسيا ۇسىندى. اتاپ ايتقاندا:
- فەرمەرلىك شارۋاشىلىقتار ءۇشىن پروگرەسسيۆتى سالىق سالۋ ۇسىنىلدى: 230 000 اەك-تەن اساتىن تابىسقا 15% مولشەرلەمە ەنگىزىلەدى؛
- KASE-دە باعالى قاعازدارمەن جاسالعان مامىلەلەردەن ديۆيدەند الاتىن ازاماتتارعا (احقو ءتارىزدى) جتس بويىنشا جەڭىلدىك بەرىلەدى؛
- بانكتىك وپەراسيالار قىمباتتاپ كەتپەۋى جانە حالىقارالىق ەسەپتەۋلەردە ىركىلىستەر بولماۋى ءۇشىن تولەم كارتالارى بويىنشا وپەراسيالار ققس-تان بوساتىلادى؛
- ليۋكس زاتتارعا (اۆتوكولىك، كەمە، ۇشاق) اكسيز تەك يمپورت كەزىندە ەمەس، ەل ىشىندە ساتىلعاندا دا الىنادى. بۇل سالىقتى تەك جەكە تۇلعالار تولەيدى؛
- مەملەكەتتىك باعالى قاعازدارمەن وپەراسيالاردان تابىس تاباتىن رەزيدەنت ەمەستەر ءۇشىن جەڭىلدىك ساقتالادى. بۇل ينۆەستيسيالاردىڭ كەتۋىنە جول بەرمەۋ ءۇشىن قاجەت؛
- سالىقتىڭ اۋىرلايتىن نورمالارى تەك 2026 جىلعى 1 قاڭتاردان باستاپ كۇشىنە ەنەدى دەپ ناقتى بەلگىلەندى؛
- كامەرالدىق باقىلاۋ بويىنشا حابارلامالارعا جاۋاپ بەرمەگەن جاعدايدا ەلەكتروندى شوت-فاكتۋرالاردى ۋاقىتشا توقتاتۋ تەتىگى ەنگىزىلەدى؛
- قۇرامىندا مۇگەدەكتىگى بار كەمىندە 10 ادام جۇمىس ىستەيتىن كاسىپورىنداردىڭ اينالىمى ققس-تان بوساتىلادى؛
- وتاندىق باسپا باسىلىمدارى ءۇشىن ققس مولشەرلەمەسى 10% بولىپ بەكىتىلەدى؛
- قورشاعان ورتاعا تەرىس اسەرى بار، ءبىراق تىرشىلىككە قاجەتتى نىساندار ءۇشىن قولدانىستاعى ەكولوگيالىق تولەم مولشەرلەمەلەرى ساقتالادى؛
- شارۋا قوجالىقتارىنا وتەۋسىز بەرىلگەن مۇلىك سالىق سالىناتىن تابىس بولىپ ەسەپتەلمەيدى.
وسى جانە وزگە دە تۇزەتۋلەرمەن بىرگە سالىق كودەكسى مەن وعان قاتىستى زاڭ جوباسى ماجىلىسكە قايتا جولداندى.
