قازاقستاندا ۇلەسكەرلەردىڭ قۇقىقتارىن قورعاۋ شارالارى كۇشەيتىلۋدە. بۇگىن سەنات "قازاقستان رەسپۋبليكاسىنىڭ كەيبىر زاڭنامالىق اكتىلەرىنە تۇرعىن ءۇي قۇرىلىسىنا، اۆتوموبيل جولدارى مەن ينۆاتاكسيگە ۇلەستىك قاتىسۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى" زاڭدى ماقۇلدادى. ونداعى جاڭاشىلدىقتىڭ ءبىرى - ەندى ءۇي ساتىپ الۋ كەزىندە ەسەپ-ايىرىسۋ قولما-قول اقشامەن جۇرگىزىلمەيتىن بولادى، دەپ حابارلايدى Dalanews.kz.
بۇل اراداعى باستى ماقسات - ۇلەسكەرلەردىڭ قۇقىقتارىن قورعاۋ شارالارىن كۇشەيتۋ، ۇلەستىك قۇرىلىس سالاسىندا ءتارتىپ ورناتۋ جانە الەۋمەتتىك ماڭىزى بار قىزمەتتەردىڭ قولجەتىمدىلىگىن ارتتىرۋ.
زاڭداعى جاڭاشىلدىقتار:
- بارلىق ۇلەستىك قاتىسۋ شارتتارىن ءبىرىڭعاي اقپاراتتىق جۇيەدە مىندەتتى تۇردە تىركەي وتىرىپ، جازباشا جانە ەلەكتروندىق نىساندا جاساۋعا رۇقسات ەتىلەدى؛
- شارتتا ۇلەسكەرلەردىڭ اقشاسىن تارتۋعا رۇقسات ەتىلگەن كۇنى مەن ءنومىرى مىندەتتى تۇردە كورسەتىلۋى ءتيىس؛
- قۇرىلىسقا رۇقساتى نەمەسە ءبىرىڭعاي وپەراتوردان الىنعان كەپىلدىگى جوق وبەكتىلەر بويىنشا يپوتەكالىق نەسيە تىركەۋگە جانە تولەمدەردى قابىلداۋعا تىيىم سالىنادى؛
- رۇقساتى جوق قۇرىلىس نىسانى بويىنشا الدىن الا كەلىسىمشارتتار جاساۋعا جانە ونى جارنامالاۋعا تىيىم سالىنادى،
- بارلىق اقشالاي ەسەپ ايىرىسۋلارتەك قولما-قول اقشاسىز جۇرگىزىلۋى ءتيىس؛
- ءۇي سالۋ قۇرىلىسىن ۇزارتۋ مەرزىمى 9 ايدان 5 ايعا دەيىن قىسقارتىلدى؛
- قۇرىلىس سالۋشىلاردىڭ ەڭ تومەنگى تاجىريبەسى 5 جىلدان 3 جىلعا دەيىن جانە سالىنعان تۇرعىن ءۇي الاڭىنا قويىلاتىن تالاپتار تومەندەتىلدى - ءبىراق بەلگىلى ءبىر شارتتار ورىندالعان جاعدايدا عانا (مىسالى، كاركاسى اياقتالعاندا نەمەسە بانكتىڭ/ءبىرىڭعاي وپەراتوردىڭ قاتىسۋى بولعاندا)؛
- شاعىن قاباتتى قۇرىلىس (سونىڭ ىشىندە جەكە تۇرعىن ءۇي كەشەندەرى) نىساندارى دا ەندى ۇلەستىك تۇرعىن ءۇي قۇرىلىسىنا قاتىسا الادى؛
- قۇرىلىسشىلاردى تەكسەرۋ جانە ولار تۋرالى كەڭەس الۋ ءۇشىن ۇلەسكەرلەردى قولداۋ ورتالىعى قۇرىلادى.
سونداي-اق اتالعان زاڭدا اۆتوجولداردىڭ ساپاسىن جاقسارتۋ شارالارى قاراستىرىلعان:
- جول ماتەريالدارىن ەسەپكە الۋدىڭ ءبىرىڭعاي جۇيەسى قۇرىلادى؛
- مەردىگەرلەر بىلىكتىلىگىن ارتتىرۋعا مىندەتتەلەدى.
سونداي-اق الەۋمەتتىك قىزمەتتەر پورتالى ارقىلى مۇگەدەكتىگى بار ادامداردى (ينۆاتاكسي) تاسىمالداۋ بويىنشا سيفرلىق سەرۆيس قولدانىسقا ەنگىزىلەدى. جەتكىزۋشىلەر بولماعان جاعدايدا قىزمەت مەملەكەتتىك ساتىپ الۋ ارقىلى كورسەتىلەتىن بولادى.
