بۇگىن اباي وبلىسى اكىمى بەرىك ءۋالي مەن «China Railway Asia-Europe Construction Investment Co.LTD» كومپانياسىنىڭ باس ديرەكتورى چجوۋ حايۆەي سەمەي قالاسىن اينالىپ وتەتىن اۆتوجول قۇرىلىسىن جۇزەگە اسىرۋعا باعىتتالعان كەلىسىمگە قول قويدى، – دەپ حابارلايدى Dalanews.kz الماتى قالاسى اكىمىنىڭ باسپا ءسوز قىزمەتىنە سىلتەمە جاساپ.

جوبا قازاق-قىتاي كاسىپورىندارىنىڭ بىرلەسكەن كونسورسيۋمى نەگىزىندە بيىلعى تامىز ايىندا باستالىپ، 2028 جىلعا دەيىن جۇزەگە اسىرىلادى. اتالعان باستاما قازاقستان رەسپۋبليكاسىنىڭ 2030 جىلعا دەيىنگى كولىك-لوگيستيكالىق الەۋەتىن دامىتۋ تۇجىرىمداماسى شەڭبەرىندە حالىقارالىق قارجى ينستيتۋتتارىمەن بىرلەسىپ ىسكە اسىرىلاتىن ەرەكشە ماڭىزى بار جوبالار تىزبەسىنە ەنگىزىلگەن.

جاڭا اينالما جولدىڭ سالىنۋى وبلىستىڭ لوگيستيكالىق الەۋەتىن ارتتىرىپ، توعىز جولدىڭ تورابىنداعى سەمەي قالاسىنىڭ كولىك جۇكتەمەسىن ازايتۋعا مۇمكىندىك بەرەدى. وبلىس ورتالىعىنداعى اسپالى كوپىر ارقىلى جىلىنا 700 مىڭعا جۋىق كولىك وتەدى.

ايماق باسشىسى وبلىس تۇرعىندارى ءۇشىن اسا ماڭىزدى جوبانىڭ ءتيىستى جۇمىستارى باستالىپ تا كەتكەنىن اتاپ ءوتتى.

– قازاق-قىتاي كاسىپورىندارىنىڭ بىرلەسكەن كونسورسيۋمى نەگىزىندە قول قويىلعان كەلىسىمگە ساي بيىل تامىز-قىركۇيەك ايلارىندا جوبانىڭ تەحنيكالىق-ەكونوميكالىق نەگىزدەمەسى جاسالادى. ال قازان، قاراشا ايلارىندا اينالما جولدىڭ الدىن الا جوباسى ازىرلەنىپ، كوپىرلەر مەن جول ايىرىقتارى اكىمدىكپەن كەلىسىلەدى.

قاراشا، جەلتوقسان ايلارىندا جۇمىس جوسپارى، قۇرىلىسقا دايىندىق اكىمدىكپەن كەلىسىلەدى. سودان كەيىن بارىپ سەمەي قالاسىن اينالىپ وتەتىن اۆتوجول قۇرىلىسى باستالادى. بۇل كەلىسىم ءبىزدىڭ ەلدەر اراسىنداعى ۇزاق مەرزىمدى ءارى ءوزارا ءتيىمدى ىنتىماقتاستىقتىڭ نەگىزىنە اينالىپ، ەۋرازياداعى حالىقارالىق كولىك دالىزدەرىنىڭ دامۋىنا ايتارلىقتاي ۇلەس قوساتىنىنا سەنىمدىمىن، – دەدى وبلىس اكىمى.

ءوز كەزەگىندە قىتايلىق كومپانيا وكىلدەرى جۇمىستى باستاۋعا دايىن ەكەنىن جەتكىزدى.  

– ەكى ەل دوستىعىنىڭ ارقاسىندا جۇزەگە اسقان استانا قالاسىنداعى LRT قۇرىلىسىنا قاتىسىپ جاتىرمىز. ءبىزدىڭ كومپانيا بۇل جوباعا بىلتىردان باستاپ ارالاسىپ، ءبىرقاتار جاقسى ناتيجەلەرگە قول جەتكىزدىك. وسى تاجىريبەمىزدى سەمەي قالاسىنداعى اينالما جول قۇرىلىسى كەزىندە ىسكە اسىرامىز دەپ ويلايمىن، – دەدى چجوۋ حايۆەي.