ارحيتەكتۋرالىق قۇرىلىسى بىرەگەي، 5000 ورىنعا ارنالعان زاماناۋي ۇلگىدەگى كوپسالالى مادەني-سپورتتىق كەشەن حالىقارالىق دەڭگەيدەگى سپورتتىق-مادەني شارالاردى قابىلداي الاتىن عيمارات بولماق.
ول الەمدىك تالاپتارعا سايكەس سالىنىپ، ءتيىستى جابدىقتارمەن قامتاماسىز ەتىلگەن. عيماراتتىڭ قاسبەتىندە اسەرلى بەينەلىك ديسپلەي ورناتىلىپ، قالا كوركىن اجارلاندىرا تۇسۋدە.
كەشەندە ءبىر مەزەتتە 120 ادامدى قابىلداي الاتىن وليمپيادالىق باسسەين مەن 55 ادامعا ارنالعان ساۋىقتىرۋ باسسەينى، زاماناۋي فونتان كەشەنى بار.
اتالمىش باسسەيندەردە سۋ سپورتى تۇرلەرىنەن تۋرنيرلەر، بالالارعا ارنالعان كەشەندى ساۋىقتىرۋ شارالارى وتكىزىلەتىن بولادى.
– بۇگىنگى ەگەمەندى ەلىمىز قارقىندى دامىپ، حالىقتىڭ ءال-اۋقاتىن جاقسارتۋ ماقساتىندا ساياسي-ەكونوميكالىق رەفورمالار ىسكە اسىرىلۋدا. بۇگىندە ەلىمىز بويىنشا شقو-نىڭ دامۋ كورسەتكىشتەرى جوعارى.
رەسپۋبليكاداعى العاشقى روبوتتاندىرىلعان حيرۋرگيا، گيبريدتى وپەراسيا اشىلدى. ەكى جىلدىڭ ىشىندە وبلىستىڭ بارلىق مەكتەپتەرى IT سىنىپتارمەن جابدىقتالدى.
وسى دامۋ قارقىنىن ودان ءارى جالعاستىرا بەرىڭىزدەر. كيەلى سەمەي جەرىندە، ۇلى ابايدىڭ تۋعان وسىنداي كەشەننىڭ اشىلۋى وتە ورىندى. بۇل شىعىسقازاقستاندىقتارعا جاسالعان ۇلكەن تارتۋ- دەدى ۇكىمەت باسشىسىنىڭ ءبىرىنشى ورىنبسارى ءاليحان سمايىلوۆ ءوز قۇتتىقتاۋىندا.
سەمەي جۇرتشىلىعى ءوز العىستارىن جەتكىزىپ، ريزالىقتارىن ءبىلدىردى.
- ەلباسىمىزدىڭ تاپسىرماسىمەن سالىنعان نىساندا تالاي سپورت جانە مادەنيەت مايتالماندارى قاناتتانادى دەپ ويلايمىز. سەمەي قالاسىنا ۇدايى كوڭىل ءبولىنىپ، سوڭعى جىلدارى ءبىرقاتار ءىرى نىساندار اشىلۋدا. سەمەي حالقىنىڭ العىستان باسقا ايتارى جوق، - دەدى سەمەي قالاسىنىڭ قۇرمەتتى ازاماتى، فيلولوگيا عىلىمدارىنىڭ دوكتورى اراپ ەسپەنبەتوۆ.
قۇرىلىسى ەكى جىلعا سوزىلعان سپورتتىق نىساننىڭ جالپى اۋماعى - 33،8 مىڭ شارشى مەتر. ءىرى كەشەننىڭ قۇرىلىسىن وتاندىق «فيرما ازيا» ج ش س جۇرگىزىپ، جالپى قۇنى 26 ملرد تەڭگەنى قۇرايدى.
[video width="848" height="480" mp4="https://dalanews.kz/wp-content/uploads/2019/12/VID-20191214-WA0039.mp4"][/video]
