وتكەن جىلدىڭ جازىندا ورىن العان اۋقىمدى ورتكە بايلانىستى مەملەكەت باسشىسى قۇقىق قورعاۋ ورگاندارىنا ورماندى زاڭسىز كەسۋگە جانە اعاشتاردى ۇرلاۋعا قارسى كۇرەس شارالارىن كۇشەيتۋدى تاپسىردى، دەپ حابارلايدى Dalanews.kz.

ءىىم اتالعان تاپسىرمانى ورىنداۋ اياسىندا وسى سالاداعى قىلمىستىق سحەمالاردى انىقتاۋ جانە جولىن كەسۋ بويىنشا جۇيەلى جۇمىس جۇرگىزىپ كەلەدى.

"9 شىلدەدە اباي وبلىسىنىڭ اۋماعىندا ءىىم جانە ۇقك جەدەل ۋاكىلدەرى پروكۋراتۋرانىڭ ۇيلەستىرۋىمەن "سەمەي ورمانى" مەملەكەتتىك ورمان تابيعي رەزەرۆاتى فيليالدارىنىڭ ءبىرىنىڭ ديرەكتورىنىڭ باسشىلىعىمەن ارەكەت ەتكەن قىلمىستىق توپتىڭ قىزمەتىنە توسقاۋىل قويدى. ورماندى جىمقىردى دەگەن كۇدىكپەن پوليسياعا 20-دان استام ادام جەتكىزىلدى. ءتىنتۋ جۇرگىزىلىپ، ۇرلانعان اعاشتاردىڭ ونداعان تەكشە مەترى، اعاش وڭدەۋ ستانوكتارى، اقشا جانە قۇجاتتار تاركىلەندى. فيليال ديرەكتورى مەن قىلمىسقا قاتىسۋشىلار ۋاقىتشا ۇستاۋ يزولياتورىنا قامالدى"، – دەدى ءىىم ۇيىمداسقان قىلمىسقا قارسى كۇرەس دەپارتامەنتىنىڭ وكىلى قۋاندىق الپىس Zakon.kz اگەنتتىگىنە.

سونداي-اق كۇدىكتىلەردىڭ لاۋازىمدىق وكىلەتتىكتى اسىرا پايدالانۋ، پارا الۋ، مۇلىكتى جىمقىرۋ فاكتىلەرىنە قاتىسى بار-جوعى تەكسەرىلەدى.

قازىرگى ۋاقىتتا تەرگەۋ جالعاسىپ جاتىر.

"ەستەرىڭىزگە سالا كەتەيىك، اعىمداعى جىلدىڭ قاڭتار ايىندا پاۆلودار وبلىسىندا "ەرتىس ورمانى" رەسپۋبليكالىق مەملەكەتتىك مەكەمەسىنىڭ ديرەكتورىنىڭ باسشىلىعىمەن ارەكەت ەتكەن قىلمىستىق توپ ۇستالعان بولاتىن. كۇدىكتىلەرگە قاتىستى ۇيىمداسقان قىلمىستىق توپ قۇرۋ، وعان باسشىلىق ەتۋ، مۇشە بولۋ فاكتىلەرى بويىنشا ءىس تەرگەلۋدە. بۇل باعىتتاعى جۇمىس جالعاسۋدا"، – دەدى قۋاندىق الپىس.