ءانشى، قازاقستاننىڭ ەڭبەك سىڭىرگەن قايراتكەرى سايات مەدەۋوۆ، توقال الۋعا قاتىستى ءوز پىكىرىن ءبىلدىردى. ءانشىنىڭ ايتۋىنشا، ونسىز دا حالىق سانى از قازاقستاندا ەكىنشى ايەل الۋعا قارسىلىق تانىتپاۋ كەرەك. سونداي-اق، مەدەۋوۆ شەتەلدىك ازاماتتارعا تۇرمىسقا شىعىپ جاتقان قازاقتىڭ قاراكوزدەرىن ءسوز ەتتى.

ۇلگىلى اكە ۇل بالا تۋىپ بەرمەگەنى ءۇشىن ايەلىن سوكپەيتىنىن ايتتى.

«ميىن اشىتپايمىن. اللانىڭ بەرگەنى عوي. باقىتتى قىزدان كورەمىز بە، ۇلدان كورەمىز بە، ءبىر اللاعا ايان. قىز، ارينە، باۋىرمال. «قىزدىڭ جامانى ءبىر شاۋگىم شايعا تاتيدى» دەگەن ءسوز بار»، – دەدى مەدەۋوۆ استانا تەلەارناسىنىڭ «سىرلاسۋ» باعدارلاماسىنا بەرگەن سۇحباتىندا.

الايدا ءوزى سوكپەسە دە، العاشقى ايەلى ۇل تاپپاعانى ءۇشىن ەكىنشى رەت ۇيلەنۋگە بەل بۋاتىن ازاماتتارعا دا تۇسىنىستىكپەن قاراۋ كەرەك ەكەنىن ءمالىم ەتتى.

«ەر ادام بالاعا بولا ەكىنشى رەت ۇيلەنۋى مۇمكىن. اركىمنىڭ ءارتۇرلى ارمانى بار. مىسالعا، مەن بولمايتىن تەمىر تۇلپاردى دا جاقسى كورىپ تۇرمىن عوي. سول سياقتى بىرەۋ ۇلدى، بىرەۋ قىزدى جاقسى كورەدى. ول ءۇشىن ەشكىمگە كىنا تاعۋعا دا بولمايدى. «نەگە ءبىرىنشى ايەلىم قىز تۋادى دەپ ەكىنشى ايەل الدىڭ؟» دەۋگە دە بولماس. ول ەكىنشى ايەلدىڭ دە ۇل تابار-تاپپاسىن ءبىر اللا بىلەدى»، – دەدى ءانشى.

سايات مەدەۋوۆ ەكىنشى ايەل الۋ ماسەلەسىنە قارسى تۇرماۋ كەرەكتىگىن، ونسىز دا قاراكوز قىزداردىڭ شەتەل اسىپ، وزگە ۇلت ازاماتتارىنىڭ ەتەگىن ۇستاپ كەتىپ جاتقانىن ءسوز ەتتى.

«ءبىراق قازىرگى زاماندا سول دۇنيەگە قارسى كەلمەۋىمىز كەرەك دەپ ويلايمىن. العان دا دۇرىس شىعار. مۇمكىن العان ادام ونى باقىتتى قىلاتىن شىعار، جاعدايىن جاساپ بەرەتىن شىعار. نەگە ءبىز وعان قارسى شىعۋىمىز كەرەك؟ قولداۋىمىز كەرەك. ويتكەنى ونسىز دا قازاعىمىزدىڭ سانى از، ونسىز دا قازاعىمىزدىڭ قىزدارى شەتەلگە كۇيەۋگە كەتىپ جاتىر»، – دەيدى ول.

 

دەرەككوزى: stan.kz