الماتىنىڭ ورتالىعىنداعى «Double Tree by Hilton Almaty» ءقوناقۇيى ءبىر كەزدەرى كاسىپكەر شولپان قارانەيەۆادان رەيدەرلىك جولمەن تارتىپ الىنعان. ءقوناقۇي قايرات ساتىبالدىنىنىڭ قولىنا ءتۇسىپ ۇلگەرگەن بولاتىن. بۇل كەزدە ەكس-پرەزيدەنت نۇرسۇلتان نازاربايەۆتىڭ نەمەرە ءىنىسى تۇرمەدە وتىرعان. تەرگەۋدە جانە ۋاقىتشا ۇستاۋ يزولياتورىندا بولعانىنا قاراماستان، ول قۇجاتتارعا قول قويىپ، قوناقۇيگە قول جەتكىزگەن. كاسىپكەر شولپان قارانەيەۆا مەن ادۆوكاتى اسقار ۋتەشوۆ ساتىبالدى ۇلى رەيدەرلىك شابۋىلدى قالاي جاساعانىن بايانداپ بەردى، - دەپ حابارلايدى Dalanews.kz.
شولپان قارانەيەۆا الماتىنىڭ قاق ورتاسىندا Hilton ءقوناقۇيىن سالۋدى شەشكەن. 2018 جىلى Capital بانكتەن نەسيە سۇراعان. ول ءۇشىن ءقوناقۇيدى كەپىلگە قويعان. بانك ءالى جۇمىس ىستەمەگەن ءقوناقۇيدى 10 ميلليارد دەپ باعالايدى. كەيىننەن پاندەميا باستالىپ، ءقوناقۇي قىزمەتى توقتاپ قالعان. پاندەميا اياقتالىپ، جۇمىس قايتا جاندانعاننان كەيىن قارانەيەۆا بانكتەن قارىزدى كەيىنگە قالدىرۋدى سۇرايدى. بانك قارسى بولىپ، نەسيەنى 2025 جىلعا دەيىن جاۋىپ تاستاۋدى مىندەتتەيدى. وسىلايشا بانك زاڭسىز ارەكەتەر جاساي باستاعان كورىنەدى.
شولپان قارانەيەۆانىڭ سوزىنشە، ءقوناقۇي كوللەكتورلاردىڭ قولىنا ءوتىپ كەتكەن. ال كوللەكتورلار ءوز كەزەگىندە ءقوناقۇيدى ساتىبالدىۇلىنا ساتىپ جىبەرگەن. ياعني كوللەكتور زاكيريانوۆا ساۋدا-ساتتىق جۇرگىزىپ، ونى جارامسىز دەپ تانىپ، ءقوناقۇيدى جەكەشەلەپ جىبەرگەن. ءبىر ايدان كەيىن «بايدالا.ب» كومپانياسى پايدا بولعان. انتيكوردىڭ مالىمەتىنشە، بۇل ساتىبالدىۇلىمەن سەرىكتەس كومپانيا بولىپ شىققان. كومپانيانىڭ قۇرىلتايشىسى – قۇلبايەۆ ەسىمدى تۇلعا. بۇل كومپانيا كوللەكتوردان ءقوناقۇيدى يەلەنەدى. ياعني كوللەكتور ءقوناقۇيدى كومپانياعا وتكىزىپ جىبەرگەن.
قارانەيەۆانىڭ ادۆوكاتى اسقار ۋتەشوۆ قايرات ساتىبالدى ۇلى كاسىپكەرگە قالاي قوقان-لوقى كورسەتكەنىن ايتىپ بەردى. ونىڭ سوزىنشە، گولليۆۋد فيلمىندەگىدەي شابۋىل جاسالعان. ساقالدى، قىسقا بالاقتى 50-گە جۋىق ادام اشۋلانىپ كەلىپ، ءقوناقۇيدى قورشاپ العان.
«كەلىپ الىپ، ءبارىن بۇعاتتاي باستادى. ونىڭ ىشىندە، ەڭ الدىمەن ورتالىق سەرۆەر جابىلدى. بەينەباقىلاۋ كامەرالارى دا ءوشىرىلدى. ولار تەك ءبىر كامەرانى بايقاماي قالدى. ءسويتىپ ولار ءار قاباتتى ارالاپ، قىزمەتكەرلەرگە «ەشتەڭەدەن قورىقپاڭىزدار، تەك باسشىلىق اۋىسىپ جاتىر. ول سىزدەرگە اسەر ەتپەيدى، ءتىپتى جالاقىلارىڭىزدى كوتەرۋىمىز مۇمكىن. ال قارانەيەۆانى قۇداي ءبىلسىن» دەگەن. ياعني بانك ءوز جۇمىسىن ىستەگەن. ەندىگى كەزەك – ساتىبالدىۇلىندا بولعان.
سول كۇنى ساتىبالدى ۇلى بىرنەشە كۇزەتشىمەن قوناقۇيگە كەلەدى. ءبىر كەزدە كونفەرەنس-زالدا ناماز وقىپ الدى. سوسىن ايەلىمەن بىرگە ءقوناقۇيدى ارالاي باستادى. ءقوناقۇيدىڭ باستىعى سياقتى ءجۇردى. ءبىز ولاردىڭ ارەكەتى زاڭعا قايشى ەكەنىن ايتا باستادىق. ەشقانداي ورگان ءۇن قاتپادى. ۇندەمەدى. سەبەبى ءبارى قورقاتىن»، - دەيدى ادۆوكات Orda.kz-كە بەرگەن سۇحباتىندا.
بۇل قاڭتار وقيعاسىنا دەيىن، 2021 جىلدىڭ 26 جەلتوقسانىندا بولعان جاعداي. قاڭتار وقيعاسىنان كەيىن بۇل وقيعانىڭ «ەكىنشى ءبولىمى» باستالعان.
«ءبىز جازعان ارىز بويىنشا اقىرى قىلمىستىق ءىس قوزعالدى. تەرگەۋ باستالدى. ءقوناقۇيدىڭ باعاسىنا قاتىستى ساراپتاما جۇرگىزەيىك دەدىك. وسىلايشا كاسىپكەر شولپان قارانەيەۆا جابىرلەنۋشى بولىپ تانىلدى. 10 اي بويى تىرناقشا ىشىندەگى تەرگەۋ جۇرگىزىلە باستادى. پروكۋرور اۋعامبايەۆ باسىندا ءبىز ايتىپ وتىرعان جانە كەلتىرىپ وتىرعان دالەلدەرمەن كەلىسىپ تۇرعانىمەن كەيىننەن ول ويىنان اينىپ قالدى. ياعني ءبىز كورسەتكەن باپ بويىنشا قىلمىس جاسالماعانىن ايتىپ، ءىستى جاۋىپ تاستادى»، - دەيدى ادۆوكات اسقار ۋتەشوۆ.
«قاڭتار وقيعاسىنان كەيىن ەشتەڭە وزگەرگەن جوق، ءبارى جوعارىدان بۇيرىق كۇتىپ وتىرادى»، - دەيدى كاسىپكەر شولپان قارانەيەۆا.
ايتا كەتەيىك،2022 جىلى ناۋرىزدا ساتىبالدى ۇلى شەتەلگە قاشىپ بارا جاتقان جەرىنەن ۇستالعان بولاتىن. بۇگىندە ول بىرنەشە باپ بويىنشا ايىپتالىپ، مۇلكى تاركىلەنىپ، التى جىلعا باس بوستاندىعىنان ايىرىلدى.
2023 جىلى جەلتوقساندا قايرات ساتىبالدى ۇلى 55 ميلليارد تەڭگەدەن اسا اقشانى مەملەكەتكە قايتارعان بولاتىن. انتيكور قايرات ساتىبالدىۇلىنا جانە باسقا دا ادامدارعا قاتىستى جۇرگىزىلىپ جاتقان تەرگەرۋ شەڭبەرىندە ەلدەن زاڭسىز شىعارىلعان اكتيۆتەردى، ونىڭ ىشىندە قىلمىستىق جولمەن الىنعان اقشانى جانە وزگە دە مۇلىكتى قايتارىپ جاتقانىن حابارلاعان بولاتىن.
كەيىننەن ساتىبالدىۇلىنا قاتىستى سوتقا دەيىنگى تەرگەۋ امالدارى اياسىندا بيىل اقپان ايىندا بيۋدجەتكە تاعى دا شامامەن 82،6 ميلليارد تەڭگە (185 ملن اقش دوللارى) ءتۇستى. بۇدان بولەك، اقمولا وبلىسىنىڭ قوسشى قالاسىنداعى 942 گەكتار جەر ۋچاسكەسى مەملەكەتكە قايتارىلدى. ونىڭ نارىقتىق قۇنى 13 ميلليارد تەڭگەدەن اسادى.
