"ماسەلەن، ءبىر كۇنى مۇنايدىڭ باعاسى ءتۇسىپ كەتەتىن بولسا، قازاقستان ەكونوميكاسىن الىپ شىعاتىن بالاما كوزدەر بولۋى كەرەك. مەنىڭشە، ولار - وڭدەۋشى ونەركاسىپ سالاسى، تۋريزم، اگروونەركاسىپ كەشەندەرى. ونىمەن قوسا، ەلىمىزدە جاسىل ەنەرگەتيكا كوزدەرىن دامىتۋعا بولادى، سونداي-اق وسى قاتاردا IT سالاسى مەن كولىك-لوگيستيكا سالاسى ءتيىمدى بولماق. بۇل سالالارعا باسىمدىق بەرەتىن بولساق، ەل ەكونوميكاسىن الداعى جىلدارى ءبىراز دەڭگەيگە كوتەرۋگە بولادى"، - دەيدى ساراپشى.
ماقسات حالىقتىڭ ايتۋىنشا، قازىرگى تاڭدا ەلىمىزدىڭ ەكونوميكالىق باعىت-باعدارى تۇسىنىكسىز جاعدايدا.
"ەكونوميكا تەك ءبىر نارسەگە بايلانىپ قالماۋعا ءتيىس. بۇگىنگى تاڭدا ۇكىمەتتىڭ جۇيەلى ءارى ءتيىمدى مودەلى جوق دەۋگە بولادى. ويتكەنى ەلىمىزدەگى سوڭعى قابىلدانعان جوبالار ۇلتتىق جوبالار بولىپ بەكىتىلگەن ەدى. الايدا ءقازىر سول جۇمىستار ماعىناسىن جوعالتىپ جاتقانىن كورىپ وتىرمىز. دەمەك 10-15 جىلدان سوڭ قازاقستان ەكونوميكاسىنىڭ قانداي بەت-بەينەسى بولادى؟ مىنە وسى ماسەلەنى جوسپارلاۋ بۇگىنگى تاڭدا كۇن تارتىبىندە تۇر"، - دەدى ساراپشى.
سونداي-اق ول ۇكىمەتتىڭ جىلدا جالاقى مولشەرىن كوتەرۋىنە قاتىستى پىكىر ءبىلدىردى.
"ءيا، كوتەرۋ كەرەك. الايدا ءالى ايلىقتى دۇرىس كوتەرگەن جوق دەپ ەسەپتەيمىن. ويتكەنى حالىقتىڭ تابىسى ارتقان جوق. بۇل ماسەلە كەشەندى تۇردە قولعا الىنۋى كەرەك"، - دەيدى ەكونوميست.
