ساماش ءابىشتىڭ بوستاندىقتا بولۋىنا نازاربايەۆپەن تۋىستىعى اسەر ەتتى مە؟

Dalanews 18 قاڭ. 2024 06:20 489



نۇرسۇلتان نازاربايەۆتىڭ نەمەرە ءىنىسى سامات ابىشكە قاتىستى قىلمىستىق ءىس سوتقا جىبەرىلدى. بۇل تۋرالى Ulysmedia.kz سايتىنىڭ ساۋالىنا بەرگەن جاۋابىندا باس پروكۋراتۋرانىڭ سوتقا دەيىنگى تەرگەۋ قىزمەتىنىڭ باسشىسى وجاروۆ ءمالىم ەتكەن، - دەپ جازادى Dalanews.kz.




ايتا كەتەيىك، سامات ءابىش 2022 جىلعى قاڭتار وقيعاسىنان كەيىن قۇقىق قورعاۋ ورگاندارىنىڭ نازارىنا تۇسكەنىمەن، ۇقك ءتوراعاسىنىڭ باسقا ءۇش ورىنباسارى سەكىلدى قاماۋعا الىنعان جوق، بوستاندىقتا ءجۇردى. تەرگەۋگە تەك كۋاگەر رەتىندە شاقىرىلدى. ايتسە دە ك.ءماسىموۆتىڭ ءبىرىنشى ورىنباسارى بولىپ تۇرعاندا، "مەملەكەتتىك توڭكەرىس جايلى بىلگەن جوقپىن" دەگەنىنە وزىنەن باسقانىڭ ءبارى كۇمانمەن قارادى.

پروكۋرورلار سول كەزدە ەكس-ەلباسىنىڭ ءىنىسى ق ر قىلمىستىق كودەكسىنىڭ 362-بابى، 4-بولىگىنە سايكەس، "بيلىكتى جانە قىزمەتتىك وكىلەتتىكتەرىن اسىرا پايدالاندى" دەگەن كۇدىككە ىلىنگەنىن، ەشقايدا كەتپەۋ تۋرالى قولحاتپەن عانا بوستاندىققا شىققانىن حابارلاعان ەدى.

سامات ءابىشتىڭ تەرگەۋ كەزىندە قاماۋعا الىنباي، بوستاندىقتا بولعانىن قالاي تۇسىنەمىز؟ ەگەر سوتتا ونىڭ كىناسى دالەلدەنسە، ونى قانداي جازا كۇتىپ تۇر؟


سىبىستار، بولجامدار جانە باسپا ءسوز حابارلاماسى


"قايعىلى قاڭتاردان" كەيىن بىردەن قىزمەتتەن قۋىلعان سامات ءابىشتىڭ الداعى تاعدىرى تۋرالى قاۋەسەت اقپارات ايدىنىندا كەڭ تالقىلاندى. بىرەۋلەر ونى ۇستالىپتى دەسە، ەندى ءبىرى ول ەلدەن قاشىپ كەتىپتى دەگەن سىڭايدا اڭگىمە ءوربىتتى.

2022 جىلدىڭ ماۋسىم ايىندا باس پروكۋراتۋرا وكىلدەرى جۋرناليستەردىڭ سۇراقتارىنا جاۋاپ بەرە وتىرىپ، ءابىشتىڭ بەلگىلى ءبىر قىلمىستىق ءىس بويىنشا «تەرگەۋ وربيتاسىندا» ەكەنىن، مۇمكىن، بايقاۋسىزدا، مۇمكىن، ادەيىلەپ ايتىپ قالدى. سول جىلدىڭ شىلدە ايىنىڭ سوڭىندا سامات ابىشتەن "كارىم ءماسىموۆ پەن باسقا دا ايىپتالۋشىلاردىڭ ءىسى" بويىنشا جاۋاپ الىنعانى حابارلاندى. بۇدان كەيىن ۆەدومستۆو سامات ءابىش قاماۋعا الىنعان بۇرىنعى ارىپتەستەرىنە قاتىستى قىلمىستىق ىستە كۋاگەر بولعانىن، ال س.ءابىشتىڭ وزىنە قاتىستى قىلمىستىق ءىس ۇلتتىق قاۋىپسىزدىك ورگاندارىندا تىركەلمەگەنىن، سوندىقتان بۇلتارتپاۋ شاراسى قولدانىلماعانىن مالىمدەدى.

باس پروكۋراتۋرا 2023 جىلدىڭ قىركۇيەگىندە كوپشىلىكتىڭ كوكەيىندە جۇرگەن ماسەلەگە قاتىستى اقپارات ايتتى. ەلىمىزدىڭ جوعارعى قاداعالاۋ ورگانى ءوزىنىڭ باسپا ءسوز حابارلاماسىندا ۇلتتىق قاۋىپسىزدىك كوميتەتى ءتوراعاسىنىڭ بۇرىنعى ءبىرىنشى ورىنباسارى سامات ابىشكە قاتىستى سوتقا دەيىنگى تەرگەۋ ءجۇرىپ جاتقانىن حابارلادى. ول قاڭتار وقيعاسى كەزىندە بيلىگى مەن قىزمەتتىك وكىلەتتىگىن اسىرا پايدالاندى دەگەن كۇدىككە ىلىنگەن.

ايتپاقشى، بۇل اقپارات قاڭتار وقيعاسى بويىنشا ايىپتالعان ۇلتتىق قاۋىپسىزدىك كوميتەتى بەسىنشى باسقارماسىنىڭ بۇرىنعى باسشىسى رۋسلان ىسقاقوۆ سوت پروسەسى كەزىندە «قانتاردا» وزىنە بۇيرىق بەرگەن باسقا ەمەس، ءدال وسى سامات ءابىش ەكەنىن ايتقاننان كەيىن تۋرا ءبىر تاۋلىك وتكەندە حابارلاندى.

"ولار ماعان سامات ءابىشتىڭ بۇيرىعىن ورىندادىم دەپ ايتۋىما تىيىم سالدى"، - دەدى رۋسلان ىسقاقوۆ سوت وتىرىسىندا سويلەگەن سوزىندە. 


كەيىن ءماجىلىس كۋلۋارىندا باس پروكۋروردىڭ ورىنباسارى اسەت شىڭدالييەۆ سامات ءابىشتىڭ ىسىنە قاتىستى پىكىر ءبىلدىردى. جۋرناليستەردىڭ سۇراقتارىنا جاۋاپ بەرگەن ول تەرگەۋ «قۇپيا» گريفىمەن ءجۇرىپ جاتقانىن العا تارتىپ، ءىس بارىسىن ەگجەي-تەگجەيلى ايتپادى.

– ءىس بويىنشا تەرگەۋ ءجۇرىپ جاتىر، - دەدى ول.    


– قانداي ەپيزودتار بويىنشا ەكەنىن ايتا المايمىن. مەن ءتىپتى بىلمەيمىن دە. ءماسىموۆ، ونىڭ ورىنباسارلارى، سامات ءابىش – ءبارى دە ۇلتتىق قاۋىپسىزدىك كوميتەتىنىڭ قىزمەتكەرلەرى. ال بۇل جاعدايدا تەك سىزدەرگە عانا ەمەس، ماعان دا كورۋگە رۇقسات ەتىلمەگەن قۇجاتتار بار.

قويىلعان سۇراقتارعا شىڭدالييەۆتىڭ بەرگەن ەڭ شىنايى  جاۋابى – سامات ءابىشتىڭ ەشقايدا كەتپەۋ تۋرالى قولحاتپەن بوساتىلعانى جايلى اقپارات.
ول ءقازىر ەلدە، - دەپ قىسقا قايىردى باس پروكۋروردىڭ ورىنباسارى.

– استانادا ما، الماتىدا ما، بىلمەيمىن. قۇقىقتىق ستاتۋسى تۋرالى دا بىلمەيمىن. قىلمىستىق ءىستىڭ بارىسى جايلى ايتا المايمىن،  ءبىراق قاڭتار وقيعاسى كەزىندە قىزمەتتىك وكىلەتتىگىن اسىرا پايدالانعانى ءۇشىن ءىس قوزعالعانى انىق، - دەدى شىڭدالييەۆ. جۋرناليستەردىڭ س.ءابىشتىڭ بوستاندىقتا بولۋىنا ن.نازاربايەۆپەن تۋىسقاندىعى اسەر ەتتى مە دەگەن سۇراققا ول «جوق» دەپ جاۋاپ بەردى.

باس پروكۋراتۋرا باسشىلىعى سۇراققا جاۋاپ بەرۋدەن قاشقاقتاعان.

تەك ايتاتىندارى: "ءابىش س.س.-نىڭ قىلمىستىق ءىسى بويىنشا مەملەكەتتىك قۇپياعا جاتاتىن مالىمەتتەر بار. وسىنى ەسكەرە وتىرىپ، سوتقا دەيىنگى تەرگەپ-تەكسەرۋ دەرەكتەرى جاريالانبايدى" دەلىنگەن جاۋاپ حاتتا.

سۋرەت: اقوردا


ۇسىنىلعان
سوڭعى جاڭالىقتار