اينالاسى ءبىر اپتادا اياقتالادى دەگەن سوعىستىڭ ءجۇرىپ جاتقانى ءبىر جىلعا تاياپ قالدى. دەمەك ەشتەڭە پۋتين ويلاعانداي جۇزەگە اسىپ جاتقان جوق.
رەسەي ءپۋتيننىڭ ارقاسىندا قۇردىمعا قۇلاپ بارا جاتقانى انىق.
ارينە، رەسەي ءبىر جىلدا ىدىراپ كەتپەيدى. بۇل ءۇردىس ونداعان جىلعا سوزىلۋى مۇمكىن.
ءبىراق يمپەريانىڭ قۇردىمعا قۇلاپ بارا جاتقانى انىق. ءدال ءقازىر رەسەيدە قۇقىقتىق مەملەكەت دەپ ايتۋعا اۋزىڭ بارمايدى. مەملەكەتتىك ينستيتۋتتار دەگراداسياعا ءتۇسىپ، باپاققا باتقان. پاتىشالى رەسەيدىڭ كەزىندە ەشكىم تۇرمەلەردى ارالاپ، "زەكتەردى" تەمىر توردىڭ ار جاعىنان سۋىرىپ الىپ، سوعىسقا سالماعانى انىق.
رەسەي اسكەرى ۋكراينا جەرىندە القىنىپ، ءوزىنىڭ اسكەري قۋاتىنىڭ قانشالىقتى ءالسىز ەكەنىن ايداي الەمگە پاش ەتكەننەن كەيىن، سوعىس ساحناسىنا قىدىروۆ پەن پريگوجين شىقتى. بۇل ەكەۋى رەتى كەلگەندە رەسەي قارۋلى كۇشتەرىنىڭ باسشىلارىن جەردەن الىپ، جەرگە سالىپ سىنايتىن بولدى. ءبىراق ەكى مىقتىنىڭ باسقالار سياقتى جاۋاپقا تارتىلعانىن كورمەدىك. ال قاراپايىم حالىق ورىس اسكەرى جايىندا از عانا سىن ايتسا، تەمىر توردىڭ ار جاعىنان ءبىراق شىعاتىنى بەلگىلى.
رەسەيدىڭ ىدىراۋىنا قاتىستى نەگىزگى اڭگىمەمىزگە قايتا ورالساق. بيىل پۋتين جۇزدەگەن ءجۋرناليستىڭ باسىن قوسىپ وتكىزەتىن ءداستۇرلى باسپا ءسوز ءماسليحاتىن وتكىزگەن جوق. وعان ۋكراينا جەرىندەگى رەسەي اسكەرىنىڭ جەڭىلىسى سەبەپ بولعانى انىق.
ەسەسىنە شەشەنستان باسشىسى رامزان قادىروۆ جۋرناليستەر مەن كەزدەسىپ، جىلدى قورىتىندىلاپ باسپا ءسوز ءماسليحاتىن وتكىزدى. وسىلايشا قادىروۆ كرەملگە رەسەيدىڭ ىدىراي باستاعانىن ايقىنداپ ايداي الەمگە بەلگى بەردى.
بۇل جەردە رامزان قادىروۆتىڭ باسپا ءسوز ءماسليحاتىندا نە ايتقانى ماڭىزدى ەمەس. ماڭىزدىسى باسپا ءسوز ءماسليحاتىن وتكىزگەنى بولىپ تۇر. بۇل – قادىروۆتىڭ كرەملگە باعىتتاعان مەسسەدجى بولعانى انىق.
سوعىس باستالعالى بەرى رامزان قادىروۆ ءوزىن رەسەيدەن بولەك ەلدىڭ باسشىسى رەتىندە سەزىنۋدە. ونىڭ ءوز ساربازدارىمەن بىرگە مايدان شەبىنە بارىپ، قارا كورسەتۋى، قورعانىس ءمينيسترى سەرگەي شويگۋ مەن باس شتابتىڭ باستىعى ۆالەريي گەراسيموۆكە قارسى سىن ايتۋى كوپ جايتتى اڭعارتسا كەرەك.
موبيليزاسيا كەزىندە «شەشەندەر سوعىسقا كوپ اسكەر جىبەرىپ نورمانى ورىندادى» دەپ ەل ىشىنەن اسكەر جيناۋدى شورت كەسكەنىن بىلەمىز.
قادىروۆتىڭ ەركىن ارەكەتكە كوشۋى بۇل رەسەي مەملەكەتتىلىگىنە سىنا قاعىلعاننىڭ بەلگىسى دەپ قابىلداۋ كەرەك. ال تاسقا تۇسكەن سىنا تاستى بولشەكتەپ تىناتىنى انىق.
