ق ر ۇقك بۇرىنعى ءتوراعاسى نارتاي دۇتبايەۆ ۇستالدى.

بۇل تۋرالى ق ر ۇقك وكىلدەرىنە سىلتەمە جاساپ Tengrinews.kz حابارلايدى.

قازاقستان رەسپۋبليكاسىنىڭ ۇلتتىق قاۋىپسىزدىك كوميتەتى مەملەكەتتىك ورگانداردىڭ ءبىرقاتار لاۋازىمدىق تۇلعالارىنا قاتىستى سوتقا دەيىنگى تەرگەپ-تەكسەرۋ جۇمىستارىن جۇزەگە اسىرۋدا.

«جۇرگىزىلگەن جەدەل ىزدەستىرۋ ءىس-شارالارى بارىسىندا 2016 جىلدىڭ 26 جەلتوقسانىندا قازاقستان رەسپۋبليكاسىنىڭ قىلمىستىق كودەكسى 185-بابىنىڭ 3-بولىمىندە («مەملەكەتتىك قۇپيالاردى جاريا ەتۋ») جانە 362-بابىنىڭ 3-بولىمىندە («بيلىكتى نەمەسە لاۋازىمدىق وكىلەتتىكتەردى اسىرا پايدالانۋ») كوزدەلگەن قىلمىستاردى جاساۋعا كۇدىكتىلىگى بويىنشا دۇتبايەۆ نارتاي نۇرتاي ۇلى، حاسەن نۇرلان بولات ۇلى جانە نۇرتايەۆ ەرلان ءسۇيىمباي ۇلى ۇستالدى»، — دەلىنگەن حابارلامادا.

سونىمەن قاتار، وسى اتالعان تۇلعالاردىڭ قازاقستان رەسپۋبليكاسى قىلمىستىق-پروسەستىك كودەكسىنىڭ 128-بابىنىڭ تارتىبىندە ۇقك ۋاقىتشا ۇستاۋ يزولياتورىنا قامالعانى حابارلاندى. كۇدىكتىلەر مەن ولاردىڭ تۋىستارىنىڭ تۇرعىلىقتى مەكەن-جايى بويىنشا ءتىنتۋ جۇمىستارى جۇرگىزىلدى، زاتتاي ايعاقتار تاركىلەندى. تەرگەۋ جالعاسىپ جاتىر، ونىڭ بارىسى مەن قورىتىندىسى قوسىمشا حابارلانادى ەكەن.

ايتا كەتەيىك، نارتاي دۇتبايەۆ 2001-2006 جىلدار ارالىعىندا ۇقك ءتوراعاسى قىزمەتىن اتقارعان بولاتىن.

https://www.youtube.com/watch؟v=zjjP9b21cl8