سالىق كودەكسى جوباسىنا تۇزەتۋلەر پارلامەنت ءماجىلىسىنىڭ قاراۋىنا قابىلداندى. بۇل اقپاراتتى Tengrinews.kz پورتالىنا ۇلتتىق ەكونوميكا مينيسترلىگى راستادى، - دەپ حابارلايدى Dalanews.kz.

سالىق كودەكسىنە وزگەرىستەر ەنگىزۋ تۋرالى ۇسىنىس ماجىلىسكە 20 اقپاندا جولدانعان.

«تۇزەتۋلەر اياسىندا مىناداي وزگەرىستەر قاراستىرىلعان:

• ققس بويىنشا مىندەتتى تىركەۋ شەگىن 20 مىڭ اەك-تەن (78،6 ميلليون تەڭگە) 3 800 اەك-كە (15 ميلليون تەڭگە) دەيىن تومەندەتۋ؛
• كەيبىر سالالار ءۇشىن 10 پايىزدىق تومەندەتىلگەن مولشەرلەمەنى ەنگىزە وتىرىپ، ققس مولشەرلەمەسىن 12%-دان 16%-عا دەيىن ۇلعايتۋ.»

11 اقپاندا پرەمەر-مينيستر ولجاس بەكتەنوۆ سالىق كودەكسىنە تۇزەتۋلەردى 20 اقپانعا دەيىن ماجىلىسكە ەنگىزۋدى تاپسىرعان بولاتىن.

مەملەكەت باسشىسى وتاندىق كاسىپكەرلەرمەن كەزدەسۋىندە ۇكىمەتكە قوسىمشا قۇن سالىعى (ققس) ماسەلەسىن قايتا قاراۋدى تاپسىردى.

«ۇكىمەت بۇل ماسەلەنى دەپۋتاتتارمەن جانە ساراپشىلارمەن ەگجەي-تەگجەيلى تالقىلاۋى كەرەك. بۇگىن ايتىلعان وي-پىكىرلەر دە ەسكەرىلەدى. مەملەكەتكە بارىنشا وڭتايلى شەشىم قاجەت. ياعني ءبىر جاعىنان بيزنەس جۇرگىزۋگە كەدەرگى كەلتىرمەي، قولايلى جاعداي جاسايتىن، ال ەكىنشى جاعىنان، سالىققا قاتىستى ءتارتىپتى كۇشەيتىپ، بيۋدجەت كىرىسىن ارتتىراتىن ءتيىمدى جولدى تابۋىمىز قاجەت»، – دەدى پرەزيدەنت.

ۇلتتىق ەكونوميكا ۆيسە-مينيسترى ازامات ءامرين سالىق رەفورماسى اياسىندا ققس بويىنشا سارالانعان مولشەرلەمەلەردى ەنگىزۋ تۋرالى ۇكىمەتتىڭ ۇسىنىستارىن ءتۇسىندىردى.

«ءبىز مىناداي تەتىكتى قاراستىرۋدى ۇسىنامىز: جالپى بەلگىلەنگەن ققس مولشەرلەمەسى 16%، اۋىل شارۋاشىلىعى ونىمدەرىن وندىرۋشىلەردى ققس-تان تولىق بوساتۋ، ال ءبىرقاتار سالالار ءۇشىن 10% مولشەرىندەگى ارالىق مولشەرلەمە. وسىلايشا ۇكىمەت ۇسىنىپ وتىرعان مولشەرلەمەلەردى سارالاۋ: 16%، 10%، 0% جانە بوساتۋ»، – دەدى ازامات ءامرين.