Salyq kodeksi jobasyna túzetýler Parlament Májilisiniń qaraýyna qabyldandy. Bul aqparatty Tengrinews.kz portalyna Ulttyq ekonomika ministrligi rastady, - dep habarlaidy Dalanews.kz.
Salyq kodeksine ózgerister engizý týraly usynys Májiliske 20 aqpanda joldanǵan.
«Túzetýler aiasynda mynadai ózgerister qarastyrylǵan:
- QQS boiynsha mindetti tirkeý shegin 20 myń AEK-ten (78,6 million teńge) 3 800 AEK-ke (15 million teńge) deiin tómendetý;
- Keibir salalar úshin 10 paiyzdyq tómendetilgen mólsherlemeni engize otyryp, QQS mólsherlemesin 12%-dan 16%-ǵa deiin ulǵaitý.»
11 aqpanda premer-ministr Oljas Bektenov Salyq kodeksine túzetýlerdi 20 aqpanǵa deiin Májiliske engizýdi tapsyrǵan bolatyn.
Memleket basshysy otandyq kásipkerlermen kezdesýinde Úkimetke qosymsha qun salyǵy (QQS) máselesin qaita qaraýdy tapsyrdy.
«Úkimet bul máseleni depýtattarmen jáne sarapshylarmen egjei-tegjeili talqylaýy kerek. Búgin aitylǵan oi-pikirler de eskeriledi. Memleketke barynsha ońtaily sheshim qajet. Iaǵni bir jaǵynan biznes júrgizýge kedergi keltirmei, qolaily jaǵdai jasaityn, al ekinshi jaǵynan, salyqqa qatysty tártipti kúsheitip, biýdjet kirisin arttyratyn tiimdi joldy tabýymyz qajet», – dedi Prezident.
Ulttyq ekonomika vitse-ministri Azamat Ámrin salyq reformasy aiasynda QQS boiynsha saralanǵan mólsherlemelerdi engizý týraly Úkimettiń usynystaryn túsindirdi.
«Biz mynadai tetikti qarastyrýdy usynamyz: jalpy belgilengen QQS mólsherlemesi 16%, aýyl sharýashylyǵy ónimderin óndirýshilerdi QQS-tan tolyq bosatý, al birqatar salalar úshin 10% mólsherindegi aralyq mólsherleme. Osylaisha Úkimet usynyp otyrǵan mólsherlemelerdi saralaý: 16%, 10%, 0% jáne bosatý», – dedi Azamat Ámrin.
