قىزىلوردا وبلىسىندا مەملەكەتتىك تۇرعىن ءۇي قورىنان پاتەر الۋ قۇقىعىن پايدالانباق بولعان ايەلدىڭ پايداسىنا سوت شەشىمى شىعارىلدى. بۇل تۋرالى وبلىستىق سوتتىڭ باسپا ءسوز قىزمەتى حابارلادى، دەپ حابارلايدى Dalanews.kz.

سوت مالىمەتىنشە، ءوتىنىش بەرۋشى ايەل 1996 جىلدان 2008 جىلعا دەيىن قىزىلوردادا ماكارەنكو اتىنداعى بالالار ۇيىندە تاربيەلەنگەن. ينتەرناتتى اياقتاعاننان كەيىن ۇزاق جىلدار بويى تۋىستارىنىڭ ساياجايىندا تۇرىپ كەلگەن. 2016 جىلى تۇرمىس قۇرىپ، ءبىر ۇل دۇنيەگە اكەلگەن. كەيىننەن ۇلىنا ءۇشىنشى توپ مۇگەدەكتىگى بەرىلگەن. الايدا اجىراسقان سوڭ، بالاسىن جالعىز ءوزى تاربيەلەپ كەلەدى. بۇرىنعى كۇيەۋىنەن ەشقانداي قولداۋ كورمەگەن.

جەتىم رەتىندە مەملەكەتتىك قوردان تۇرعىن ءۇي الۋعا قۇقىعى بار ەكەنىن ول جاقىندا عانا بىلگەن. ءتيىستى ورگانعا كەزەككە قويۋ تۋرالى ءوتىنىش بەرگەنىمەن، تۇرعىن ءۇي ينسپەكسياسى ونى ەسەپكە الۋدان باس تارتقان. وسىدان كەيىن ايەل سوتقا جۇگىنگەن.

"ءبىرىنشى ينستانسياداعى سوت مەملەكەتتىك ورگاننىڭ ارەكەتسىزدىگىن انىقتادى. ياعني، جاۋاپتى قۇرىلىم ءوتىنىش يەسىن "اتا-اناسىنىڭ قامقورلىعىنسىز قالعان بالالار" ساناتىنا جاتاتىن ازامات رەتىندە ۋاقىتىندا تۇرعىن ءۇي كەزەگىنە قويماعان. سونىمەن قاتار سوت ايەلدىڭ الەۋمەتتىك وسال توپقا جاتاتىنىن جانە باسپاناعا مۇقتاج ەكەنىن ەسكەردى"، – دەلىنگەن سوت حابارلاماسىندا.

سوت وتىرىسىندا تۇرعىن ۇيگە كەزەككە تۇرۋ قۇقىعى ازاماتشا مەكتەپتى اياقتاپ، اتتەستات العان كۇننەن، ياعني 2008 جىلعى 20 ماۋسىمنان باستاپ تۋىنداعانى ناقتىلاندى. وسىعان سايكەس، سوت ونىڭ تۇرعىن ءۇي الۋ قۇقىعىن مويىنداپ، كەزەككە سول كۇننەن باستاپ قويۋدى مىندەتتەدى.

قالانىڭ اكىمى مەن تۇرعىن ءۇي ينسپەكسياسى بولىمىنە ايەلدى ەسەپكە الۋ تۋرالى سوت قاۋلىسىن ورىنداۋ تاپسىرىلدى. قاۋلى زاڭدى كۇشىنە ەندى.