1 ماۋسىم – حالىقارالىق بالالاردى قورعاۋ كٷنٸندە قىزىلوردادا بٸرقاتار ەلەۋمەتتٸك ماڭىزى بار ٸرٸ نىساندار قولدانىسقا بەرٸلدٸ. اشىلۋ رەسٸمٸنە قازاقستان رەسپۋبليكاسى پرەمەر-مينيسترٸنٸڭ ورىنباسارى ەرمەك كٶشەرباەۆ, وبلىس ەكٸمٸ نۇرلىبەك نەلٸباەۆ پەن بٸرقاتار زييالى قاۋىم ٶكٸلٸ قاتىستى.
مەرەكە قارساڭىندا پايدالانۋعا بەرٸلگەن قايتا جاڭعىرتۋدان ٶتكەن قالالىق مەدەني-دەمالىس پاركٸ قالا تۇرعىندارى مەن قوناقتارىنىڭ كٶڭٸلٸنەن شىقتى.
بالالارعا ارنالعان ويىن الاڭدارى, جارىق شامدار مەن زاماناۋي ينفراقۇرىلىم كٶپشٸلٸكتٸڭ جوعارى باعاسىنا يە بولدى.
سالتاناتتى شارادا ايماق باسشىسى بالالاردى مەرەكەمەن قۇتتىقتاپ, جىلى لەبٸزٸن بٸلدٸردٸ.
– پرەزيدەنتٸمٸز قاسىم-جومارت كەمەلۇلى: «ۇل-قىزدارىمىزدىڭ پاراساتتى, جان-جاقتى بولىپ ٶسۋٸنە جاعداي جاساۋ, جاس ازاماتتارىمىزدىڭ قۇقىعىن قورعاپ, دەنساۋلىعىن ساقتاۋ – مەملەكەتٸمٸزدٸڭ باستى مٸندەتٸ», - دەگەن بولاتىن. بٷگٸن ايماعىمىز ٷشٸن ايتۋلى كٷن. مەرەكەگە وراي قايتا جاڭعىرتۋدان ٶتكەن قالالىق مەدەني-دەمالىس پاركٸ, فيزيكا-ماتەماتيكا مەكتەپ-ينتەرناتى, مۋزىكالىق كوللەدجدٸڭ جاڭا عيماراتى, وبلىستىق تاريحي-ٶلكەتانۋ مۋزەيٸ اشىلۋدا.
دەل وسى كٷنٸ لەنتاسى قيىلعان كەزەكتٸ نىسان – فيزيكا-ماتەماتيكا باعىتىنداعى «بٸلٸم-يننوۆاتسييا» ليتسەي-ينتەرناتى. اشىلۋ رەسٸمٸنە اكادەميك, مەملەكەتتٸك سىيلىقتىڭ يەگەرٸ, فيزيكا-ماتەماتيكا عىلىمدارىنىڭ دوكتورى, قازاقستاننىڭ ەڭبەك ەرٸ اسقار جۇمادٸلداەۆ پەن «بٸلٸم-يننوۆاتسييا» حالىقارالىق قوعامدىق قورىنىڭ پرەزيدەنتٸ دارحان ٶتە ارنايى قاتىستى.
سونداي-اق, قازانعاپ اتىنداعى قىزىلوردا مۋزىكالىق كوللەدجٸنٸڭ جاڭا عيماراتى دا ەل يگٸلٸگە تابىستالدى. جاڭا عيماراتتا ستۋدەنتتەرگە بارلىق جاعداي جاسالعان. وبلىس ەكٸمٸ ٶز سٶزٸندە ٶنەر قايراتكەرلەرٸنٸڭ لايىقتى ٸزٸن جالعايتىن ٶنەر ورداسىنىڭ سىر مەدەنيەتٸنٸڭ قارا شاڭىراعىنا اينالعانىن ايتتى.
– ەلۋ جىلعا جۋىق تاريحى بار قازانعاپ اتىنداعى قىزىلوردا مۋزىكالىق جوعارى كوللەدجٸ سىر توپىراعىندا ۇرپاقتان ۇرپاققا جالعاسقان مەدەني مۇرانىڭ, ۇلتتىق ٶنەردٸڭ كەمەلدەنۋٸنە زور ٷلەس قوسىپ كەلەدٸ. بٷگٸنگە دەيٸن وقۋ ورنى تالاپقا ساي كەلمەيتٸن ەسكٸ عيماراتتا قيىندىقتارعا قاراماستان جاستارعا بٸلٸم بەرٸپ, ٶنەرگە باۋلىدى. جاڭا عيماراتتا ستۋدەنتتەرگە بارلىق جاعداي جاسالعان. ٷلكەن كونتسەرت, بي زالدارى, حور بٶلمەسٸ بار. كەڭ مۋزىكالىق پەندٸك كابينەتتەر جاڭا زاماناۋي قۇرال-جابدىقتارمەن قامتىلعان. ماتەريالدىق-تەحنيكالىق بازاسى زامان تالابىنا ساي كەلەتٸن 200 ورىندىق جاتاقحانا شالعاي ەلدٸ مەكەننەن كەلگەن جاس ٶرەندەردٸ قابىلداۋعا دايىن, – دەدٸ ن. نەلٸباەۆ.
سونىمەن قاتار, وبلىستىق تاريحي-ٶلكەتانۋ مۋزەيٸنٸڭ جاڭا عيماراتى دا قولدانىسقا بەرٸلدٸ. پرەمەر-مينيستردٸڭ ورىنباسارى ەرمەك كٶشەرباەۆ سىر ەلٸندەگٸ بايىپتى باستامالارعا وڭ باعاسىن بەرٸپ, تۇرعىنداردى جاڭا عيماراتتىڭ اشىلۋىمەن قۇتتىقتادى.
ايماق باسشىسى جاڭا عيماراتتىڭ ۇلت رۋحانيياتىنا قىزمەت ەتٸپ, مەدەني مۇرالاردىڭ ورداسىنا اينالۋىنا تٸلەگٸن بٸلدٸردٸ.
