قىرعىزستاندا اەس قۇرىلىسى رەفەرەندۋمعا شىعارىلۋى مۇمكىن. «روساتوممەن» كەلىسسوزدەر جالعاسىپ جاتىر، دەپ حابارلايدى Dalanews.kz.
قىرعىزستان بيلىگى اتوم ەلەكتر ستانسياسىن سالۋ ماسەلەسى بويىنشا روساتوم مەملەكەتتىك كورپوراسياسىمەن كەلىسسوزدەردى جالعاستىرىپ جاتىر.
مينيسترلەر كابينەتىنىڭ ءتوراعاسىنىڭ ءبىرىنشى ورىنباسارى دانيار امانگەلدييەۆتىڭ ايتۋىنشا، قازىرگى تاڭدا تاراپتار ينفراقۇرىلىم قالىپتاستىرۋ جانە كادر دايارلاۋ باعىتىندا جۇمىس ىستەۋدە.
«تەك وسى كەزەڭدەردەن كەيىن عانا اەس سالۋ ماسەلەسىن قاراستىرۋعا بولادى»، – دەدى ول.
امانگەلدييەۆ تۇپكىلىكتى شەشىم ازاماتتاردىڭ قاتىسۋىمەن قابىلداناتىنىن اتاپ ءوتتى. وسىعان بايلانىستى بۇل ماسەلەنى رەفەرەندۋمعا شىعارۋ جوسپارلانىپ وتىر.
مينيسترلەر كابينەتى اتوم ەنەرگەتيكاسىن دامىتۋ ەلدەگى ەنەرگيا تاپشىلىعىن شەشۋدىڭ نەگىزگى جولدارىنىڭ ءبىرى بولۋى مۇمكىن دەپ ەسەپتەيدى.
