ءال-فارابي اتىنداعى قازاق ۇلتتىق ۋنيۆەرسيتەتىنىڭ باسقارما ءتوراعاسى – رەكتورى جانسەيىت تۇيمەبايەۆ ءازىربايجان، قىرعىزستان، باشقۇرتستان، تاتارستان، موڭعوليا، تۇركيا عىلىم اكادەميالارى پرەزيدەنتتەرىمەن جانە حازار ۋنيۆەرسيتەتىمەن ىنتىماقتاستىق تۋرالى مەموراندۋمعا قول قويدى، – دەپ حابارلايدى Dalanews.kz قازۇۋ-دىڭ باسپا ءسوز قىزمەتىنە سىلتەمە جاساپ.

مەموراندۋم ماقساتى – سەرىكتەستىكتى دامىتۋ، عىلىمي باعىتتا بىرلەسىپ زەرتتەۋلەر جۇرگىزۋ جانە عىلىمي كادرلاردىڭ بىلىكتىلىگىن ارتتىرۋ.

قول قويۋ راسىمىنە ءازىربايجان رەسپۋبليكاسى عىلىم اكادەمياسىنىڭ پرەزيدەنتى يسا گابيببەيلي، قىرعىز رەسپۋبليكاسى عىلىم اكادەمياسىنىڭ پرەزيدەنتى قاناتبەك ءابدىراحماتوۆ، تۇركيا عىلىم اكادەمياسىنىڭ پرەزيدەنتى مۋزاففەر شەكەر، باشقۇرتستان عىلىم اكادەمياسىنىڭ پرەزيدەنتى كاميل رامازانوۆ، تاتارستان رەسپۋبليكاسى عىلىم اكادەمياسىنىڭ ۆيسە-پرەزيدەنتى دانيا زاگيدۋللينا، موڭعوليا عىلىم اكادەمياسىنىڭ پرەزيدەنتى رەگدەل دۋگەر جانە حازار ۋنيۆەرسيتەتىنىڭ نەگىزىن قالاۋشى جانە رەكتورى گاملەت يساحانلى قاتىستى.

مەموراندۋم اياسىندا تاراپتار كىتاپحانا قورلارىن پايدالانۋعا جانە عىلىمي باعىتتا جازىلعان جاريالانىمدار مەن ماتەريالداردى الماسۋعا، بىرلەسكەن سەمينارلار مەن كونفەرەنسيالار ۇيىمداستىرۋعا، عىلىمي جانە اكادەميالىق ەڭبەكتەردى بىرلەسىپ باسىپ شىعاراتىن بولادى.

سالتاناتتى شارادان سوڭ قازۇۋ باسشىسى جانسەيىت تۇيمەبايەۆ بۇگىنگى مەموراندۋم ۇلكەن ناتيجەلەرگە قول جەتكىزۋگە سەپ بولاتىنىن جەتكىزدى.