مۇنداعى ماقسات – سمارت-تەحنولوگيالاردى دامىتۋ مەن سمارت-ۋنيۆەرسيتەتتەردى قۇرۋ باعىتتارى بويىنشا ءوزارا بىلىكتىلىك الماسۋ. سونىمەن قاتار جوعارى وقۋ ورىندارىنىڭ ساندىق جۇيەگە كوشۋ بارىسىمەن تانىستىرۋ.
ءبىلىم ورداسىنىڭ باسشىسى جانسەيىت تۇيمەبايەۆ قازۇۋ-دىڭ سمارت-ۋنيۆەرسيتەتكە اينالۋدىڭ سوڭعى كەزەڭىنە اياق باسقانىن جەتكىزدى. «بۇگىنگى تاڭدا جوعارى وقۋ ورنىنىڭ تەحنيكالىق جابدىقتالۋى قارقىندى جۇرگىزىلۋدە. كامپۋس ستۋدەنتتەر مەن قىزمەتكەرلەر ءۇشىن تولىقتاي قولايلى ورتاعا اينالاتىن بولادى. بارلىق بيزنەس-ۇدەرىستەر مەن بايلانىس جۇيەلەرىن وڭتايلاندىرۋ، جەكەلەگەن قىزمەتتەر جەلىسىن اۆتوماتتاندىرۋ قولعا الىندى. قازاقستان رەسپۋبليكاسى ءبىلىم جانە عىلىم مينيسترلىگىمەن ءتۇرلى اۆتوماتتاندىرۋ جۇيەلەرىن ينتەگراسيالاۋ جۇزەگە اسىرىلادى» دەپ اتاپ ءوتتى.
قازىرگى ساتتە كامپۋستىڭ ساندىق قىزمەتتەرى تولىعىمەن جاڭعىرتىلۋ ۇستىندە. بارلىق عيماراتتاردى باسقارۋ ءۇشىن ارنايى قابىلداعىشتار جانە اقىلدى تەحنولوگيالار پايدالانىلادى.
بۇدان بولەك، ءبىلىم ورداسىندا ساندىق جۇيەدە وقىتۋدىڭ جاڭا ادىستەرى ەنگىزىلۋدە. بۇل پاندەميا جاعدايىندا اسا ماڭىزدى بولىپ وتىر. ۋنيۆەرسيتەت «بارشانى قولايلى وقىتۋدى» – كەز كەلگەن ۋاقىتتا جانە بارلىق قۇرىلعىدا قولجەتىمدى ەتۋگە كىرىستى. ناتيجەسىندە وقىتۋشى-پروفەسسورلار قۇرامى باعالاۋ مەن تيىمدىلىكتى ارتتىرۋ قۇرالدارىن قولدانا وتىرىپ، جاڭا پەداگوگيكالىق مۇمكىندىكتەرگە جول اشۋدا.
ۋنيۆەرسيتەتتىڭ ءدال وسىنداي جەتىستىكتەرى حالىقارالىق ارىپتەستەر تاراپىنان مويىندالىپ، قازۇۋ سمارت-تەحنولوگيالار مەكتەبىن ۇيىمداستىرۋ مارتەبەسىنە يە بولدى. ءبىلىم الاڭىندا الەمنىڭ 7 ەلىنەن، ونىڭ ىشىندە ەۋروپا مەملەكەتتەرىنەن اقپاراتتىق-كوممۋنيكاسيالىق تەحنولوگيالار جانە اۆتوماتتاندىرۋ سالاسىنىڭ جەتەكشى عالىمدارى قاتىسىپ، ءوز تاجىريبەسىمەن بولىسۋدە.
مەكتەپ جۇمىسىندا ءال-فارابي اتىنداعى قازۇۋ-دىڭ سمارت-تەحنولوگيالاردى قولدانۋداعى ۇزدىك جوبالارى كوپشىلىك نازارىنا ۇسىنىلدى.
اتاپ ايتساق، جوو-نىڭ بارلىق كوممۋنيكاسيالارىنىڭ ساندىق جۇيەگە كوشۋى، كامپۋسقا كىرگەن كەزدە تۇلعانى تانۋ تەحنولوگياسى، قالاشىقتاعى قاۋىپسىزدىك مونيتورينگى. سونداي-اق ساباقتاردى باقىلاۋ، وقۋشىلاردىڭ ۇلگەرىمىن تالداۋ، قىزمەتكەرلەر جۇمىسىنىڭ تيىمدىلىگىن ساراپتاۋ، اقىلدى قالالار تەحنولوگيالارى، «جاسىل» كامپۋس جانە تاعى باسقالار. سونداي-اق قازۇۋ ماگيسترانتتارىنىڭ «اقىلدى جىلىجاي» ارنايى جوباسى قاتىسۋشىلاردىڭ قىزىعۋشىلىعىن وياتتى. رەسپۋبليكالىق فيزيكا-ماتەماتيكا مەكتەبى ءۇشىن دايىندالىپ جاتقان جوباعا وقۋشىلار دا تارتىلاتىن بولادى.
ايتا كەتسەك، Erasmus اقىلدى قالالار تەحنولوگياسىنىڭ ماگيسترلىك باعدارلاماسىنا يننوۆاسيالىق تاسىلدەردى ەندىرۋ جوباسى اياسىندا بۇگىندە گرەك ۋنيۆەرسيتەتىمەن قوس ديپلوم باعدارلاماسى ازىرلەنىپ، تابىستى ىسكە اسىرىلۋدا. ناتيجەسىندە قازاقستاننىڭ التى ماگيسترانتى گرەكيا حالىقارالىق ۋنيۆەرسيتەتىندە ءبىلىم الدى. سونىمەن قاتار ەۋروپالىق جوو مەن ءال-فارابي اتىنداعى قازۇۋ بازاسىندا ماگيسترلىك ديسسەرتاسيالار قورعالادى دەپ كۇتىلۋدە.
جازعى مەكتەپ جۇمىسى 30 ساۋىرگە دەيىن سوزىلادى.
